Sermo antequam iret in exsilium

[00001]    ΤΟΥ ΑΥΤΟΥ ΟΜΙΛΙΑ ΠΡΟ ΤΗΣ ΕΞΟΡΙΑΣ.

52.427

[00002]    αʹ.

[00003]    Πολλὰ τὰ κύματα καὶ χαλεπὸν τὸ κλυδώνιον·

[00004]    ἀλλ' οὐ δεδοίκαμεν, μὴ καταποντισθῶμεν·

[00005]    ἐπὶ γὰρ τῆς πέτρας ἑστήκαμεν.

[00006]    Μαινέσθω ἡ θάλασσα, πέτραν διαλῦσαι οὐ δύναται·

[00007]    ἐγειρέσθω τὰ κύματα, τοῦ Ἰησοῦ τὸ πλοῖον καταποντίσαι οὐκ ἰσχύει.

[00008]    Τί δεδοίκαμεν, εἰπέ μοι;

[00009]    Τὸν θάνατον;

[00010]    Ἐμοὶ τὸ ζῇν Χριστὸς, καὶ τὸ ἀποθανεῖν κέρδος.

[00011]    Ἀλλ' ἐξορίαν, εἰπέ μοι;

[00012]    Τοῦ Κυρίου ἡ γῆ, καὶ τὸ πλήρωμα αὐτῆς.

[00013]    Ἀλλὰ χρημάτων δήμευσιν;

[00014]    Οὐδὲν εἰσηνέγκαμεν εἰς τὸν κόσμον, δῆλον ὅτι οὐδὲν ἐξενεγκεῖν δυνάμεθα·

[00015]    καὶ τὰ φοβερὰ τοῦ κόσμου ἐμοὶ εὐκαταφρόνητα, καὶ τὰ χρηστὰ καταγέλαστα.

[00016]    Οὐ πενίαν δέδοικα, οὐ πλοῦτον ἐπιθυμῶ·

[00017]    οὐ θάνατον φοβοῦμαι, οὐ ζῆσαι εὔχομαι, εἰ μὴ διὰ τὴν ὑμετέραν προκοπήν.

[00018]    ∆ιὸ καὶ τὰ νῦν ὑπομιμνήσκω, καὶ παρακαλῶ τὴν ὑμετέραν θαῤ ^[52.428] ῥεῖν ἀγάπην.

[00019]    Οὐδεὶς γὰρ ἡμᾶς ἀποσπάσαι δυνήσεται·

[00020]    ὃ γὰρ ὁ Θεὸς συνέζευξεν, ἄνθρωπος χωρίσαι οὐ δύναται.

[00021]    Εἰ γὰρ περὶ γυναικὸς καὶ ἀνδρὸς λέγει·

[00022]    Ἀντὶ τούτου καταλείψει ἄνθρωπος τὸν πατέρα αὐτοῦ καὶ τὴν μητέρα, καὶ προσκολληθήσεται τῇ γυναικὶ αὐτοῦ, καὶ ἔσονται οἱ δύο εἰς σάρκα μίαν·

[00023]    ὃ οὖν ὁ Θεὸς ἔζευξεν, ἄνθρωπος μὴ χωριζέτω.

[00024]    Εἰ γάμον οὐ δύνασαι διασπάσαι, πόσῳ μᾶλλον Ἐκκλησίαν Θεοῦ οὐκ ἰσχύεις καταλῦσαι;

[00025]    ἀλλὰ πολεμεῖς αὐτὴν, οὐ δυνάμενος βλάψαι τὸν πολεμούμενον.

[00026]    Ἀλλ' ἐμὲ μὲν ἐργάζῃ λαμπρότερον, ἑαυτοῦ δὲ τὴν ἰσχὺν καταλύεις τῆς πρὸς ἐμὲ μάχης·

[00027]    Σκληρὸν γάρ σοι πρὸς κέντρα ὀξέα λακτίζειν.

[00028]    Οὐκ ἀμβλύνεις τὰ κέντρα, ἀλλὰ τοὺς ^[52.429] πόδας αἱμάσσεις·

[00029]    ἐπεὶ καὶ τὰ κύματα τὴν πέτραν οὐ διαλύει, ἀλλ' αὐτὰ εἰς ἀφρὸν διαλύονται.

[00030]    Οὐδὲν Ἐκκλησίας δυνατώτερον, ἄνθρωπε.

[00031]    Λῦσον τὸν πόλεμον, ἵνα μὴ καταλύσῃ σου τὴν δύναμιν·

[00032]    μὴ εἴσαγε πόλεμον εἰς οὐρανόν.

[00033]    Ἄνθρωπον ἐὰν πολεμῇς, ἢ ἐνίκησας, ἢ ἐνικήθης.

[00034]    Ἐκκλησίαν δὲ ἐὰν πολεμῇς, νικῆσαί σε ἀμήχανον·

[00035]    ὁ Θεὸς γάρ ἐστιν ὁ πάντων ἰσχυρότερος.

[00036]    Μὴ παραζηλοῦμεν τὸν Κύριον;

[00037]    μὴ ἰσχυρότεροι αὐτοῦ ἐσμεν;

[00038]    Ὁ Θεὸς ἔπηξε, τίς ἐπιχειρεῖ σαλεύειν;

[00039]    Οὐκ οἶσθα αὐτοῦ τὴν δύναμιν.

[00040]    Ἐπιβλέπει ἐπὶ τὴν γῆν, καὶ ποιεῖ αὐτὴν τρέμειν·

[00041]    κελεύει, καὶ τὰ σειόμενα ἡδράζετο.

[00042]    Εἰ τὴν πόλιν σαλευομένην ἔστησε, πολλῷ μᾶλλον τὴν Ἐκκλησίαν στῆσαι δύναται.

[00043]    Ἡ Ἐκκλησία οὐρανοῦ ἰσχυροτέρα·

[00044]    Ὁ οὐρανὸςκαὶ ἡ γῆ παρελεύσονται, οἱ δὲ λόγοι μου οὐ μὴ παρέλθωσι.

[00045]    Ποῖοι λόγοι;

[00046]    Σὺ εἶ Πέτρος, καὶ ἐπὶ ταύτῃ μου τῇ πέτρᾳ οἰκοδομήσω μου τὴν Ἐκκλησίαν, καὶ πύλαι ᾅδου οὐ κατισχύσουσιν αὐτῆς.

[00047]    βʹ.

[00048]    Εἰ ἀπιστεῖς τῷ λόγῳ, πίστευε τοῖς πράγμασι.

[00049]    Πόσοι τύραννοι ἠθέλησαν περιγενέσθαι τῆς Ἐκκλησίας;

[00050]    πόσα τήγανα;

[00051]    πόσοι κάμινοι, θηρίων ὀδόντες, ξίφη ἠκονημένα;

[00052]    καὶ οὐ περιεγένοντο.

[00053]    Ποῦ οἱ πολεμήσαντες;

[00054]    Σεσίγηνται καὶ λήθῃ παραδέδονται.

[00055]    Ποῦ δὲ ἡ Ἐκκλησία;

[00056]    Ὑπὲρ τὸν ἥλιον λάμπει.

[00057]    Τὰ ἐκείνων ἔσβεσται, τὰ ταύτης ἀθάνατα.

[00058]    Εἰ ὅτε ὀλίγοι ἦσαν, οὐκ ἐνικήθησαν, ὅτε ἡ οἰκουμένη ἐπλήσθη εὐσεβείας, πῶς νικῆσαι δύνασαι;

[00059]    Ο οὐρανὸς καὶ ἡ γῆ παρελεύσονται, οἱ δὲ λόγοι μου οὐ μὴ παρέλθωσι.

[00060]    Καὶ μάλα εἰκότως·

[00061]    ποθεινοτέρα γὰρ ἡ Ἐκκλησία τῷ Θεῷ τοῦ οὐρανοῦ.

[00062]    Οὐρανοῦ σῶμα οὐκ ἀνέλαβεν, Ἐκκλησίας δὲ σάρκα ἀνέλαβε·

[00063]    διὰ τὴν Ἐκκλησίαν ὁ οὐρανὸς, οὐ διὰ τὸν οὐρανὸν ἡ Ἐκκλησία.

[00064]    Μηδὲν ὑμᾶς θορυβείτω τῶν γενομένων.

[00065]    Τοῦτό μοι χαρίσασθε, πίστιν ἀπερίτρεπτον.

[00066]    Οὐκ εἴδετε τὸν Πέτρον περιπατοῦντα ἐπὶ τῶν ὑδάτων, καὶ ὀλίγον διστάσαντα, καὶ μέλλοντα καταποντίζεσθαι, οὐ διὰ τὴν ἄτακτον τῶν ὑδάτων ὁρμὴν, ἀλλὰ διὰ τὴν ἀσθένειαν τῆς πίστεως;

[00067]    Μὴ γὰρ ἀνθρωπίναις ψήφοις ἐνταῦθα ἤλθομεν;

[00068]    μὴ γὰρ ἄνθρωπος ἤγαγεν, ἵνα ἄνθρωπος καταλύσῃ;

[00069]    Ταῦτα λέγω οὐκ ἀπονοούμενος, μὴ γένοιτο, οὐδὲ ἀλαζονευόμενος, ἀλλὰ τὸ ὑμῶν σεσαλευμένον στηρίξαι βουλόμενος.

[00070]    Ἐπειδὴ ἔστη ἡ πόλις, Ἐκκλησίαν ὁ διάβολος ἠθέλησε σαλεῦσαι.

[00071]    Μιαρὲ καὶ παμμίαρε διάβολε, τοίχων οὐ περιεγένου, καὶ Ἐκκλησίαν προσδοκᾷς σαλεῦσαι;

[00072]    Μὴ γὰρ ἐν τοίχοις ἡ Ἐκκλησία;

[00073]    Ἐν τῷ πλήθει τῶν πιστῶν ἡ Ἐκκλησία.

[00074]    Ἰδοὺ πόσοι στῦλοι ἑδραῖοι, οὐ σιδήρῳ δεδεμένοι, ἀλλὰ πίστει ἐσφιγμένοι.

[00075]    Οὐ λέγω ὅτι τοσοῦτον πλῆθος πυρὸς σφοδρότερον·

[00076]    ἀλλ' οὔτε, εἰ εἷς ἦν, περιεγένου.

[00077]    Καὶ οἶδας, οἷά σοι τραύματα παρέσχον οἱ μάρτυρες.

[00078]    Εἰσῆλθε πολλάκις κόρη ἁπαλὴ ἀπειρόγαμος·

[00079]    κηροῦ ἦν ἁπαλωτέρα, καὶ πέτρας ἐγένετο στερεωτέρα.

[00080]    Τὰς πλευρὰς αὐτῆς ἔξεες, καὶ τὴν πίστιν αὐτῆς οὐκ ἔλαβες.

[00081]    Ἠτόνησε τῆς σαρκὸς ἡ φύσις, καὶ οὐκ ἀπηγορεύθη τῆς πίστεως ἡ δύναμις·

[00082]    ἐδαπανᾶτο τὸ σῶμα, ἐνεανιεύετο τὸ φρόνημα·

[00083]    ἀνηλίσκετο δὲ ἡ οὐσία, καὶ ἔμενεν ἡ εὐλάβεια.

[00084]    Γυναικὸς οὐ περιεγένου μιᾶς, καὶ τοσούτου περιγενέσθαι δήμου προσδοκᾷς;

[00085]    Οὐκ ἀκούεις τοῦ Κυρίου λέγοντος, Ὅπου δύο ἢ τρεῖς εἰσι συνηγμένοι εἰς τὸ ὄνομά μου, ἐκεῖ εἰμι ἐν μέσῳ αὐτῶν;

[00086]    Ὅπου τοσοῦτος δῆμος ἀγάπῃ ἐσφιγμένος, οὐ πάρεστιν;

[00087]    Ἔχω αὐτοῦ ἐνέχυρον·

[00088]    μὴ γὰρ οἰκείᾳ δυνάμει θαῤῥῶ;

[00089]    Γραμματεῖον αὐτοῦ κατέχω.

[00090]    Ἐκεῖνό μοι βακτηρία, ἐκεῖνό μοι ἀσφάλεια, ἐκεῖνό μοι λιμὴν ^[52.430] ἀκύμαντος.

[00091]    Κἂν ἡ οἰκουμένη ταράττηται, τὸ γραμματεῖον κατέχω·

[00092]    αὐτῷ ὰ(f.

[00093]    αὐτὸ) ἀναγινώσκω·

[00094]    τὰ γράμματα ἐκεῖνα τεῖχος ἐμοὶ καὶ ἀσφάλεια.

[00095]    Ποῖα ταῦτα;

[00096]    Ἐγὼ μεθ' ὑμῶν εἰμι πάσας τὰς ἡμέρας ἕως τῆς συντελείας τοῦ αἰῶνος.

[00097]    Χριστὸς μετ' ἐμοῦ, καὶ τίνα φοβηθήσομαι;

[00098]    Κἂν κύματα κατ' ἐμοῦ διεγείρηται, κἂν πελάγη, κἂν ἀρχόντων θυμοί·

[00099]    ἐμοὶ ταῦτα πάντα ἀράχνης εὐτελέστερα.

[00100]    Καὶ εἰ μὴ διὰ τὴν ὑμετέραν ἀγάπην, οὐδὲ σήμερον ἂν παρῃτησάμην ἀπελθεῖν.

[00101]    Ἀεὶ γὰρ λέγω, Κύριε, τὸ σὸν θέλημα γενέσθω·

[00102]    μὴ ὅ τι ὁ δεῖνα, καὶ ὁ δεῖνα, ἀλλ' εἴ τι σὺ βούλει.

[00103]    Οὗτος ἐμοὶ πύργος, τοῦτο ἐμοὶ πέτρα ἀκίνητος·

[00104]    τοῦτο ἐμοὶ βακτηρία ἀπερίτρεπτος.

[00105]    Εἰ βούλεται ὁ Θεὸς τοῦτο γενέσθαι, γινέσθω.

[00106]    Εἰ βούλεται ἐνταῦθα εἶναί με, χάριν ἔχω.

[00107]    Ὅπου βούλεται, εὐχαριστῶ.

[00108]    γʹ.

[00109]    Μηδεὶς ὑμᾶς θορυβείτω·

[00110]    ταῖς εὐχαῖς προσέχετε.

[00111]    Ταῦτα ἐποίησεν ὁ διάβολος, ἵνα ἐκκόψῃ τὴν σπουδὴν τὴν περὶ τὰς λιτανείας.

[00112]    Ἀλλ' οὐ προχωρεῖ αὐτῷ·

[00113]    ἀλλὰ σπουδαιοτέρους ὑμᾶς καὶ θερμοτέρους εὑρήκαμεν.

[00114]    Αὔριον εἰς λιτανεῖον ἐξελεύσομαι μεθ' ὑμῶν.

[00115]    Ἢ ὅπου ἐγὼ, καὶ ὑμεῖς ἐκεῖ·

[00116]    ὅπου ὑμεῖς, ἐκεῖ κἀγώ·

[00117]    ἓν σῶμά ἐσμεν·

[00118]    οὐ σῶμα κεφαλῆς, οὐ κεφαλὴ σώματος χωρίζεται.

[00119]    ∆ιειργόμεθα τῷ τόπῳ, ἀλλ' ἡνώμεθα τῇ ἀγάπῃ·

[00120]    οὐδὲ θάνατος διακόψαι δυνήσεται.

[00121]    Κἂν γὰρ ἀποθάνῃ μου τὸ σῶμα, ζῇ ἡ ψυχὴ, καὶ μέμνηται τοῦ δήμου·

[00122]    ὑμεῖς ἐμοὶ πατέρες·

[00123]    πῶς ὑμῶν δύναμαι ἐπιλαθέσθαι;

[00124]    ὑμεῖς ἐμοὶ πατέρες, ὑμεῖς ἐμοὶ ζωὴ, ὑμεῖς ἐμοὶ εὐδοκίμησις.

[00125]    Ἐὰν ὑμεῖς προκόψητε, ἐγὼ εὐδοκιμῶ·

[00126]    ὥστε ἐμοὶ ζωὴ πλοῦτος ἐν τῷ ὑμετέρῳ κεῖται θησαυρῷ.

[00127]    Ἐγὼ μυριάκις ὑπὲρ ὑμῶν σφαγῆναι ἕτοιμος (καὶ οὐδεμίαν χάριν παρέχω, ἀλλὰ καὶ ὀφειλὴν ἀποδίδωμι·

[00128]    Ὁ γὰρ ποιμὴν ὁ καλὸς τὴν ψυχὴν αὐτοῦ τίθησιν ὑπὲρ τῶν προβάτων), καὶ σφαγῆναι μυριάκις, καὶ μυρίας κεφαλὰς ἀποτμηθῆναι.

[00129]    Ἐμοὶ ὁ θάνατος οὗτος ἀθανασίας ὑπόθεσις, ἐμοὶ αἱ ἐπιβουλαὶ αὗται ἀσφαλείας ἀφορμή.

[00130]    Μὴ γὰρ διὰ χρήματα ἐπιβουλεύομαι, ἵνα λυπηθῶ;

[00131]    μὴ γὰρ δι' ἁμαρτήματα, ἵνα ἀλγήσω;

[00132]    ∆ιὰ τὸν ἔρωτα τὸν περὶ ὑμᾶς·

[00133]    ἐπειδὴ πάντα ποιῶ, ὥστε ὑμᾶς ἐν ἀσφαλείᾳ μεῖναι, ὥστε μηδένα παρεισελθεῖν τῇ ποίμνῃ, ὥστε μεῖναι ἀκέραιον τὸ ποίμνιον.

[00134]    Ἡ ὑπόθεσις τῶν ἀγώνων ἀρκεῖ μοι εἰς στέφανον.

[00135]    Τί γὰρ ἂν πάθοιμι ὑπὲρ ὑμῶν;

[00136]    Ὑμεῖς ἐμοὶ πολῖται, ὑμεῖς ἐμοὶ πατέρες, ὑμεῖς ἐμοὶ ἀδελφοὶ, ὑμεῖς ἐμοὶ τέκνα, ὑμεῖς ἐμοὶ μέλη, ὑμεῖς ἐμοὶ σῶμα, ὑμεῖς ἐμοὶ φῶς, μᾶλλον δὲ καὶ τοῦ φωτὸς τούτου γλυκύτεροι.

[00137]    Τί γὰρ τοιοῦτον παρέχει μοι ἡ ἀκτῖνα οἷον ἡ ὑμετέρα ἀγάπη;

[00138]    Ἡ ἀκτῖνα ἐν τῷ παρόντι με βίῳ ὠφελεῖ, ἡ δὲ ὑμετέρα ἀγάπη στέφανόν μοι πλέκει ἐν τῷ μέλλοντι.

[00139]    Ταῦτα δὲ λέγω εἰς ὦτα ἀκουόντων·

[00140]    τί δὲ τῶν ὤτων ὑμῶν ἀκουστικώτερον;

[00141]    Τοσαύτας ἡμέρας ἠγρυπνήσατε, καὶ οὐδὲν ὑμᾶς ἔκαμψεν, οὐ χρόνου μῆκος μαλακωτέρους ὑμᾶς ἐποίησεν, οὐ φόβοι, οὐκ ἀπειλαί·

[00142]    πρὸς πάντα ἐγένεσθε γενναῖοι.

[00143]    Καὶ τί λέγω, ἐγένεσθε;

[00144]    Τοῦτο ὅπερ ἐπεθύμουν ἀεὶ, κατεφρονήσατε τῶν βιωτικῶν πραγμάτων, ἀπετάξασθε τῇ γῇ, εἰς τὸν οὐρανὸν μετέστητε·

[00145]    ἀπηλλάγητε τῶν συνδέσμων τοῦ σώματος, πρὸς τὴν μακαρίαν ἐκείνην ἁμιλλᾶσθε φιλοσοφίαν.

[00146]    Ταῦτα ἐμοὶ στέφανοι, ταῦτα παράκλησις, ταῦτα παραμυθία, ταῦτα ἐμοὶ ἄλειμμα, ταῦτα ζωὴ, ταῦτα ἀθανασίας ὑπόθεσις.

[00147]    δʹ.

[00148]    Ἀλλ' ὁρῶ τοῖς ἐμαυτοῦ δόγμασί τινας ἐγκαρτερεῖν με πειθόντων.

[00149]    Φέρει γὰρ πολλὰ τῶν εὐτυχημάτων εἰς τοὐναντίον·

[00150]    ὅτι οἷς ἐδόκουν ζηλωτὴς εἶναι, περιπέπτωκα τῇ μοχθηρίᾳ·

[00151]    οἱ μὲν κατὰ τὸν τρόπον καθαιροῦντες νικῶσι τὸν ἀγῶνα τῇ διαφορᾷ τῶν πραγμάτων·

[00152]    οὐκ ἠπείλουν, ἀλλὰ παρίσταντο.

[00153]    Ἔστι γὰρ καιρὸς νῦν εἰπεῖν τὰ περὶ τῆς ἐμῆς θλίψεως.

[00154]    Νόμος ἐστὶν, ἀλλ' ὁ νομοθέτης νικᾶται.

[00155]    Τέκνα, μὰ τὴν ὑμετέραν ἀγάπην, βλέπω συσκευὴν πολεμοῦσαν, καὶ τὸν Θεὸν ὑβριζόμενον·

[00156]    βλέπω τὸν ἀγῶνα πίπτοντα, καὶ τὸν ἀγωνοθέτην λυπούμενον·

[00157]    βλέπω τὸ πιθανὸν τῆς ἀληθείας μαραινόμενον, καὶ τὴν συσκευὴν ἀνθοῦσαν.

[00158]    Λέγουσί μοι, ὅτι Ἔφαγες καὶ ἐβάπτισας.

[00159]    Εἰ ἐποίησα τοῦτο, ἀνάθεμα ἔσομαι·

[00160]    μὴ ἀριθμηθείην εἰς ἐπισκόπων ῥίζαν·

[00161]    μὴ γένωμαι μετ' ἀγγέλων·

[00162]    μὴ ἀρέσω Θεῷ·

[00163]    εἰ δὲ καὶ ἔφαγον καὶ ἐβάπτισα, οὐδὲν ἄκαιρον τῶν πραγμάτων ἐποίησα.

[00164]    Πρόσχες μοι μετὰ ἀκριβείας ὃ λέγω, καὶ λέγων οὐ παύσομαι.

[00165]    Ἐμοὶ μὲν τὸ λέγειν οὐκ ὀκνηρὸν, ὑμῖν δὲ ἀσφαλές.

[00166]    Ἀλλ' ἐπανέλθωμεν ἐπὶ τὸ προκείμενον.

[00167]    Λέγουσιν ὅτι ἔφαγον καὶ ἐβάπτισα.

[00168]    Καθελέτωσαν οὖν Παῦλον, ὅτι μετὰ τὸ δειπνῆσαι ἐχαρίσατο τῷ δεσμοφύλακι τὸ βάπτισμα.

[00169]    Τολμῶ λέγειν, καθελέτωσαν καὶ αὐτὸν τὸν Χριστὸν, ὅτι μετὰ τὸ δεῖπνον τοῖς μαθηταῖς τὴν κοινωνίαν ἐχαρίσατο.

[00170]    Ἀλλ' εἰκότα καὶ μεγάλα ἡμῖν ταῦτα·

[00171]    ταῦτα φαιδρὰ τῆς εἰρήνης·

[00172]    ταῦτα τοῦ λαοῦ τὰ ἐγκώμια.

[00173]    Ἐμοῦ ὁ στέφανος, ὑμῶν ὁ καρπός.

[00174]    Ἀλλ' οἴδατε, ἀγαπητοὶ, διὰ τί με θέλουσι καθελεῖν.

[00175]    Ὅτι τάπητας οὐχ ἥπλωσα, οὔτε σηρικὰ ἱμάτια οὐκ ἐνεδυσάμην, καὶ ὅτι τὴν γαστριμαργίαν αὐτῶν οὐ παρεμυθησάμην.

[00176]    Ἤνθησαν γὰρ τὰ ἔγγονα τῆς ἀσπίδος, ἔτι περιλέλειπται τῆς Ἰεζάβελ ὁ σπόρος·

[00177]    ἔτι δὲ καὶ ἡ χάρις τῷ Ἠλίᾳ συναγωνίζεται.

[00178]    Φέρε δέ μοι εἰς μέσον τὸν θαυμαστὸν καὶ πλούσιον τῆς ζωῆς κήρυκα, Ἰωάννην λέγω, τὸν πένητα, καὶ ἕως λύχνου μὴ κτησάμενον·

[00179]    εἶχε γὰρ τὴν λαμπάδα τοῦ Χριστοῦ·

[00180]    οὗ τὴν κεφαλὴν ἐπεθύμησεν ἡ τῆς Εὔας συλλειτουργὸς, ἡ τῶν ἁγίων ἐμπόδιον γενομένη, ἡ τοὺς προφήτας διώξασα, ἡ τὴν ἐν δόλῳ νηστείαν κηρύξασα, ἡ ὁμότιμον τοῦ ὀνόματος τῆς ἐχίδνης ἐπισταμένη τὴν ὄρχησιν, ἐν τῷ ἀρίστῳ τῷ ἀτελεῖ ὀρχησαμένη.

[00181]    Οὐκ ἐπεθύμησε ζωὴν, οὐκ ἐπεθύμησε χρημάτων ὄγκον, οὐ βασιλείας ἀξίωμα, οὐκ ἄλλης τινὸς περιουσίας.

[00182]    Ἀλλ' εἰπέ μοι, ἄνθρωπε, τί ἐπεθύμησε;

[00183]    Κεφαλὴν ἀνθρώπου.

[00184]    Τί δὲ λέγω;

[00185]    Οὐ μόνον ἀνθρώπου, ἀλλ' εὐαγγελιστοῦ.

[00186]    Ἀλλ' οὐκ ἐνίκησε λαβοῦσα τὴν κεφαλήν.

[00187]    Ἔτεμε γὰρ τὴν κεφαλὴν αἰτησαμένη, τὴν ἄνομον ἐπιθυμίαν σπουδαίως διὰ πίνακος δεξαμένη.

[00188]    Βλέπε, καὶ θαύμασον τοῦ Θεοῦ τὴν δύναμιν.

[00189]    ∆ιήλεγχεν ὁ ἀναίτιος, ἀπετμήθη·

[00190]    ἀλλ' ^[52.432] ὁ ἀποτμηθεὶς ἐν δεξιᾷ τοῦ Χριστοῦ, ἡ δὲ ἀπαραίτητον κόλασιν ἐκδέχεται.

[00191]    Πάλιν ἐκείνης τὸ σπέρμα, ὁ σπόρος ὁ ἀκανθώδης ἐπιζητεῖ καὶ σπεύδει.

[00192]    Ἀλλ' Ἡρωδιὰς Ἰωάννου τὴν κεφαλὴν ζητοῦσα πάλιν ὄρχησιν, οὐχ ἣν τοῖς ποσὶ παίζομεν, ἀλλὰ τὴν τῆς Μαρίας ἐπερειδομένην.

[00193]    Πάλιν βοᾷ καὶ λέγει Ἰωάννης·

[00194]    Οὐκ ἔξεστί σοι τὴν γυναῖκα ἔχειν τοῦ ἀδελφοῦ σου.

[00195]    εʹ.

[00196]    Ἀλλὰ τί εἴπω;

[00197]    ∆ακρύων ὁ παρὼν καιρός·

[00198]    πάντα γὰρ εἰς ἀδοξίαν ἐκτρέχει, καὶ πάντα χρόνος κρίνει.

[00199]    Χρυσὸς τὸ ὅλον δοξάζει.

[00200]    Ἀλλὰ φέρε μοι τὸν ἅγιον ∆αυῒδ τὸν λέγοντα καὶ βοῶντα·

[00201]    Χρυσὸς ἐὰν ῥέῃ, μὴ προστίθεσθε καρδίαν.

[00202]    Ἀλλ' εἰπέ μοι, τίς ἦν οὗτος ὁ ταύτην τὴν φωνὴν ἐπαφείς;

[00203]    Οὐχὶ τὸ τῆς βασιλείας ἐπὶ τῆς κορυφῆς συγκείμενον εἶχεν;

[00204]    οὐκ ἐν τῇ βασιλικῇ ἐξουσίᾳ διέταττεν;

[00205]    Ἀλλ' οὐ πρὸς ἁρπαγὴν ἔβλεπεν, οὐκ εἰς καθαίρεσιν εὐσεβείας ἦν αὐτῷ τὸ φρόνημα, οὐδὲ μέριμνα θησαυρῶν, ἀλλὰ τῆς στρατοπέδων συλλογῆς·

[00206]    οὐ γυναικὸς συγκατάθεσιν.

[00207]    Φεύγετε οὖν, γυναῖκες, τὰς ἀλλοτρίας συλλογάς·

[00208]    μὴ συμβουλεύετε τοῖς ἀνδράσι συμβουλίαν κακήν·

[00209]    ἀλλ' ἀσφαλίσθητε τοῖς λεχθεῖσιν.

[00210]    Ἆρα ἐσβέσαμεν ὑμῶν τὴν φλόγα;

[00211]    ἆρα ἐμαλάχθη ὑμῖν ἡ καρδία;

[00212]    Ἀλλ' οἶδα ὅτι ὠφεληθήσεσθε μὲν αἱ τῆς Μαρίας θυγατέρες·

[00213]    ἄλλαι δὲ ἄνευ οἴνου κεκορεσμέναι καὶ μεθύουσαι τῇ φιλαργυρίᾳ, ὡς ὁ μακάριος Παῦλος βοᾷ καὶ κηρύττει λέγων·

[00214]    Ῥίζα πάντων τῶν κακῶν ἡ φιλαργυρία.

[00215]    Οὕτω καὶ αἱ ἀσύνετοι γυναῖκες ἀποφράττουσιν ἑαυτῶν τὰ ὦτα, καὶ ἀντὶ σπόρου ἀγαθοῦ ἀκάνθας τίκτουσιν.

[00216]    Ἀλλὰ, παρακαλῶ, μὴ ἡμῶν τὸν σπόρον ὡς ἐπὶ πέτραν καταβάλλωμεν.

[00217]    Χριστοῦ ἐσμεν γεώργιον, παρ' οὗ ἀκούσωμεν·

[00218]    Εὖ, δοῦλε ἀγαθὲ, εἴσελθε εἰς τὸν οἶκόν μου·

[00219]    μὴ ἀντὶ τῆς φωνῆς ταύτης λεχθῇ, Εὖ, δοῦλε κακέ.

[00220]    Ἀλλὰ, παρακαλῶ, λαμψάτω ὑμῶν ἡ πολιτεία ἔμπροσθεν τῶν ἀνθρώπων, μὴ μωράνωμεν ἡμῶν τὸ ἅλας, ἀλλὰ δοξάσωμεν, εὐχαριστήσωμεν, οἱ πλούσιοι τῷ πλουσίῳ, οἱ πένητες τῷ φιλανθρώπῳ, καὶ φιλοπτώχῳ Χριστῷ, οἱ δυνατοὶ τῇ κραταιᾷ χειρὶ αὐτοῦ.

[00221]    Καὶ ταῦτα μὲν περὶ ὑμῶν.

[00222]    Ἴσως δὲ συγχωρεῖ ὁ Θεὸς ταῦτά με πάσχειν ἅπερ βουλεύονται κατ' ἐμοῦ, ἵνα ἐν συμφοραῖς δοκιμάσῃ τὰ κατ' ἐμέ·

[00223]    ὅτι ἐν τοῖς πόνοις ἐναπόκειται νίκη πάντως, καὶ ἐν τοῖς ἀγῶσιν ἡτοίμασται στέφανος.

[00224]    Καὶ γὰρ ὁ θεσπέσιος Παῦλος ἔλεγε·

[00225]    Τὸν δρόμον τετέλεκα, τὴν πίστιν τετήρηκα·

[00226]    λοιπὸν ἀπόκειταί μοι ὁ τῆς δικαιοσύνης στέφανος·

[00227]    οὗ στεφάνου καταξιώσει ὑμᾶς ὁ τῶν ὅλων ∆εσπότης εἰς τοὺς αἰῶνας.

[00228]    Ἀμήν.

[00229]    ὰὰ

© 2006 Cooperatorum Veritatis Societas quoad hanc editionem iura omnia asservantur.
0345-0407 - Iohannes Chrysostomus - Sermo antequam iret in exsilium
Litterarum Omnium Conspectus: 130 Litterae, quae repetitae sunt in 9,541 occasionibus