[00001]    Ιn illud: Σi qua in Χhristo nova creaturaὰ

[00002]    Ηʹ.

[00003]    Τοῦ αὐτοῦ εἰς τὸ, Εἴ τις ἐν Χριστῷ, καινὴ κτίσις·

[00004]    τὰ ἀρχαῖα παρῆλθον, ἰδοὺ γέγονε τὰ πάντα καινά.

64.25

[00005]    Πολλὴ μὲν γηπόνῳ προθυμία καταβάλλειν τὰ σπέρματα, ἐπειδὰν τὴν ἄρουραν ἐκκεκαθαρμένην ἴδῃ, καὶ μήτε ἀκανθῶν πλῆθος λυμαινόμενον τῇ βλάστῃ τῶν φυομένων, μήτε λίθον ἀντικρούοντα τῷ ἀρότρῳ·

[00006]    πλείων δὲ εὐκολία τῷ μέλλοντι καταβάλλειν τὸν λόγον, ἐπειδὰν ἀκροατὴν παρεσκευασμένον θεάσηται.

[00007]    Ταῦτα λέγω, οὐκ ἐπειδὴ οὐ πάρεισιν οἱ πλούσιοι, τὴν τῶν πενήτων φιλοσοφίαν ἐν τῷ λόγῳ τῆς ἀκροάσεως ἐπιδεικνύων.

[00008]    Οὐ γὰρ τοῦ λέγοντος χρεία μόνον, ἀλλὰ καὶ τοῦ συνετῶς ἀκούοντος·

[00009]    ἀμφότερα γὰρ ἡ Γραφὴ ἐπιζητεῖ, σοφὸν διδάσκαλον καὶ συνετὸν ἀκροατὴν, ἵνα μὴ ὁ πόνος ὁ ἡμέτερος περιττὸς γένηται τῇ ῥᾳθυμίᾳ τῶν ἀκουόντων.

[00010]    Ἡ γὰρ φροντὶς οὐκ ἀφίησιν εἰς τὴν διάνοιαν ἐμπίπτειν τὰ λεγόμενα, ἀλλ' ἀποσυλᾷ τὴν γνώμην τῶν ἀκουόντων.

[00011]    Ἐπεὶ οὖν ἅπαντας ὁρῶ παρεσκευασμένους·

[00012]    τὰ μὲν γὰρ ἀπόῤῥητα τῆς διανοίας οὐκ ἐπίσταμαι, ἑκάστου δὲ τὰ ὄμματα περιεργάζομαι, καὶ τὰ βλέφαρα ὡς κέρατα ἑστηκότα ὁρῶ, καὶ τὸ ἀτρεμὲς τοῦ ὄμματος τὸ ἀσάλευτον τῆς διανοίας ἡμῖν ἐμφαῖνον, καὶ ἑκάστην διάνοιαν ἀπηλλαγμένην τῶν βιωτικῶν φροντίδων, μόνον ἕκαστον τοῦτο σκοποῦντα, τοῦτο λογιζόμενον, ὅπως δέξηται τὰ λεγόμενα·

[00013]    ἐπὶ πλέον συντείνατε ἑαυτῶν τὴν διάνοιαν·

[00014]    ἁπλώσατε τὸν κόλπον τῆς ψυχῆς, ὥστε μετ' εὐκολίας καταβληθῆναι τὰ σπέρματα.

[00015]    ∆ιὰ γὰρ μακροῦ τοῦ χρόνου ἐπὶ τὴν Παύλου τράπεζαν τὴν γλῶτταν ἀφεῖναι βούλομαι·

[00016]    οὐ γὰρ παύσομαι οὕτως αὐτὸν καλῶν, τὸν ἰδιώτην, τὸν ἄσημον, τὸν ἀγενῆ, τὸν σκηνοποιόν.

[00017]    Ταῦτά μου τὰ πλεονεκτήματα, ταῦτά μου τὰ ἐγκώμια, ὅτι τοιούτους ἔχω διδασκάλους, οὐ βιωτικοῖς πλεονεκτήμασιν, ἀλλὰ πνευματικοῖς κατορθώμασι λάμποντας.

[00018]    Ἐὰν εἴπῃ μοι ὁ Ἕλλην, Τίνα ἔχεις διδάσκαλον;

[00019]    λέγω αὐτὸν τὸν σκηνοποιόν·

[00020]    καὶ τίνα ἄλλον;

[00021]    τὸν ἰχθυοπώλην·

[00022]    καὶ τίνα ἄλλον;

[00023]    τὸν τελώνην·

[00024]    καὶ τίνας ἄλλους·

[00025]    τοὺς μάγους καὶ τὴν πόρνην·

[00026]    καὶ τίνα ἄλλον;

[00027]    τὸν λῃστήν·

[00028]    καὶ οὐκ ἐπαισχύνομαι, ἀλλὰ καὶ ἐγκαλλωπίζομαι.

[00029]    Ἐγκαλλωπίζῃ διδάσκαλον ἀγοραῖον ἔχων;

[00030]    Καὶ πάνυ.

[00031]    ∆ιὰ τί;

[00032]    Εἰ γὰρ ἡ εὐτέλεια τοῦ μαθητοῦ δείκνυσι τὴν δύναμιν τοῦ διδασκάλου, ἡ εὐτέλεια τοῦ διδασκάλου δείκνυσι θεῖον ὂν τὸ κήρυγμα.

[00033]    Εἰ γὰρ καὶ ἄνθρωποι αὐτὸ κατήγγειλαν, ἀλλ' οὐκ ἄνθρωποι αὐτὸ ηὗραν·

[00034]    εἰ γὰρ καὶ ἄνθρωποι αὐτὸ ἔσπειραν, ἀλλ' οὐκ ἄνθρωποι αὐτὸ ἐγέννησαν.

[00035]    Οἱ ἄνθρωποι ὄργανα, ὁ Θεὸς τεχνίτης·

[00036]    οὗτοι κιθάρα, ἡ χεὶρ ἡ κραταιὰ ἐκείνη τὴν νευρὰν ἐκίνησε.

[00037]    ∆ιὰ δὲ τοῦτο καὶ ὁ Προφήτης ἐκεῖνος, καίτοι γε βασιλεὺς ὢν καὶ πορφύραν περιβεβλημένος καὶ διάδημα περικείμενος, καὶ τὴν οἰκουμένην διαλεγόμενος, καταλείπων τὴν φαντασίαν τὴν βιωτικὴν, ἵνα [δὲ] μή τις νομίσῃ ὅτι βασιλικὰ ῥήματα ἔλεγεν·

[00038]    Ἐξερεύξατο ἡ καρδία μου λόγον ἀγαθόν·

[00039]    λέγω ἐγὼ τὰ ἔργα μου τῷ Βασιλεῖ.

[00040]    Ἡ γλῶσσά μου κάλαμος γραμματέως.

[00041]    ∆ιὰ τί κάλαμον καλεῖς;

[00042]    Ἵνα μάθῃς ὅτι οὐκ ἐμὰ τὰ γράμματα, ἀλλὰ τῆς κατεχούσης δεξιᾶς.

[00043]    Ὁ γὰρ κάλαμος οὐκ ἀφ' ἑαυτοῦ γράφει, ἀλλ' ὅπερ ἂν βούληται ἡ κατέχουσα χείρ.

[00044]    Καὶ ἡ γλῶσσά μου κάλαμός ἐστιν·

[00045]    κατέχει γὰρ αὐτὴν τὸ Πνεῦμα τὸ ἅγιον.

[00046]    Ὅταν οὖν λέγῃ σοι ὁ Ἕλλην, Τίς σου ὁ διδάσκαλος;

[00047]    μὴ αἰσχύνου μηδὲ ἐρυθρία, ἀλλὰ λέγε·

[00048]    Ὁ ἀγοραῖος, ὁ σκηνοποιὸς, ὁ ἐπ' ἀγορᾶς ἑστηκὼς, ὁ δέρματα ῥάπτων.

[00049]    Ὁ σὸς δὲ τίς διδάσκαλος;

[00050]    Πλάτων, Πυθαγόρας, οὐκ ἀγοραῖος, ἀλλὰ φιλόσοφος.

[00051]    Εἰ δὲ λέγω ἐγὼ, Ὁ σὸς διδάσκαλος τίς;

[00052]    φιλόσοφος·

[00053]    ὁ σὸς διδάσκαλος εὐπατρίδης, ὁ σὸς διδάσκαλος πλούσιος, ὁ σὸς διδάσκαλος γλῶτταν ἔχων ἠκονημένην, ὑπὲρ τοὺς ποταμοὺς ῥέων, τιμῆς ἀπολαύων, περιφάνειαν ἔχων προγόνων, πανταχοῦ τιμώμενος·

[00054]    ὁ ἐμὸς τὰ ἐναντία·

[00055]    οὕτω φανερὰ ἡμῖν ἡ νίκη γίνεται.

[00056]    Πῶς;

[00057]    Ὅτι ἀγοραῖος τὸν φιλόσοφον ἐνίκησεν, ὁ πένης τὸν πλούσιον, ὁ ἄγλωττος τὸν ὑπὲρ τοὺς ποταμοὺς ῥέοντα, ὁ μαστιγούμενος τὸν μηδὲν πάσχοντα.

[00058]    Ἀνώμαλος ἡ παράταξις, ἵνα ^[64.26] λαμπρότερον τὸ τρόπαιον γένηται.

[00059]    Σολοικίζει ὁ ἐμὸς, Ἀττικίζει ὁ σός·

[00060]    ὁ σολοικίζων τὸν Ἀττικίζοντα ἐνίκησεν·

[00061]    σολοικίζει τὴν γλῶτταν, ἀλλὰ φιλοσοφεῖ τῇ διανοίᾳ·

[00062]    οὐ χρείαν ἔχω ῥημάτων, ἀλλὰ δέομαι νοημάτων.

[00063]    Ὁ ἐμὸς τὸν σὸν ἐνίκησε·

[00064]    πῶς;

[00065]    ὁ ἰδιώτης τὸν σοφὸν, ὁ ἄγροικος τὸν ῥήτορα.

[00066]    Καὶ πόθεν, φησὶ, δῆλον ὅτι ἐνίκησεν·

[00067]    Ἀναίσχυντε, οὐχ ὁρᾷς τὰ πράγματα βοῶντα;

[00068]    Ποῦ Πλάτων;

[00069]    οὐδαμοῦ·

[00070]    ποῦ Παῦλος;

[00071]    ἐν τοῖς ἁπάντων στόμασι.

[00072]    Ποῦ Πλάτων;

[00073]    σεσίγηται, καὶ λήθῃ παραδέδοται·

[00074]    ποῦ δὲ Παῦλος;

[00075]    τὴν βασιλίδα κατέλαβε Ῥώμην, ἧς οὐ μόνον ζῶν ἐκράτει, ἀλλὰ καὶ τελευτήσας περιεγένετο.

[00076]    Ἀπέθανε τὸ σῶμα ἵνα ζήσῃ πνεύματι·

[00077]    διεσπάσθη ὁ χάρτης, καὶ μένει τὰ γράμματα·

[00078]    οὐ μέλανι γὰρ ἐγέγραπτο, ἀλλὰ πνεύματι ἐστήρικτο.

[00079]    Εὔκολον τὸν ἥλιον παραβῆναι ἢ Παύλου ῥήματα.

[00080]    Τί γάρ φησιν ὁ χαρισάμενος αὐτῷ τὰ ῥήματα;

[00081]    Ὁ οὐρανὸς καὶ ἡ γῆ παρελεύσονται, οἱ δὲ λόγοι μου οὐ μὴ παρέλθωσιν.

[00082]    Εἰ ῥήματά ἐστιν, ἔλεγξον·

[00083]    εἰ δὲ πράγματά ἐστι, προσκύνησον.

[00084]    Ὁ οὐρανὸς καὶ ἡ γῆ παρελεύσονται, οἱ δὲ λόγοι μου οὐ μὴ παρέλθωσιν.

[00085]    Εὐκολώτερον τὸν ἥλιον σβεσθῆναι, καὶ τὸν οὐρανὸν ἀφανισθῆναι, ἢ τὰ ῥήματα τοῦ ἐμοῦ ∆εσπότου καταλυθῆναι.

[00086]    Καὶ μαρτυρεῖ τούτοις τῶν πραγμάτων ἡ πεῖρα, καὶ τοῦ χρόνου τὸ μῆκος, καὶ τῶν πολεμούντων αἱ ἔφοδοι·

[00087]    τὸ γὰρ δὴ θαυμαστὸν, ὅτι οὐ μόνον οὐ κατελύθη, ἀλλ' ὅτι καὶ πολεμούμενος περιγίνεται.

[00088]    Πρόσεχε μετὰ ἀκριβείας ᾧ λέγω·

[00089]    Ἐφθέγξατο Παῦλος, ἐφθέγξατο Ἰωάννης, ὁ ἁλιεὺς καὶ εὐαγγελιστὴς, ὁ ῥίψας τὸ δίκτυον καὶ λαβὼν τὸ Εὐαγγέλιον, ὁ ἀφεὶς τὸν κάλαμον τὸν ἁλιευτικὸν καὶ μεταχειρισάμενος τὸν λόγον τὸν διδασκαλικόν.

[00090]    Τί ἐφθέγξατο, καὶ τί εἶπεν ὁ ἁλιεύς;

[00091]    Ἴδωμεν εἰ ἁλιεύω τὰ ῥήματα καὶ ἁλιέως, καὶ οὐχ ἁλιέως·

[00092]    ἁλιέως μὲν, ἐπειδὴ τὸ στόμα ἐκεῖνο ἐφθέγξατο·

[00093]    οὐχ ἁλιέως δὲ, ἐπειδὴ Πνεύματος ἦν τὰ ῥήματα.

[00094]    Τί γάρ φησιν;

[00095]    Ἐν ἀρχῇ ἦν ὁ Λόγος, καὶ ὁ Λόγος ἦν πρὸς τὸν Θεὸν, καὶ Θεὸς ἦν ὁ Λόγος.

[00096]    Τί λέγει ὁ Ἰουδαῖος;

[00097]    Μέγα φρονεῖ ἐπὶ Μωϋσεῖ, ὅτι τὴν θάλασσαν ἔσχισε, καὶ τὸ πέλαγος διεῖλε καὶ ἔῤῥαψε, καὶ τὸν ἀέρα μετέβαλε, καὶ πέτραν ἐξέτεμε, καὶ μάννα κατήνεγκε, καὶ πόλεις αὐτάνδρους καθεῖλε, καὶ πολέμους χωρὶς ὅπλων ἐνίκησε.

[00098]    ∆ιὰ τοῦτο μέγα φρονεῖς;

[00099]    Ἄκουσον τί μὲν Μωϋσῆς εἶπε, τί δὲ ὁ ἁλιεὺς, ἵνα ἴδῃς τί πτωχεία Παλαιᾶς ∆ιαθήκης, καὶ τί δαψίλεια χάριτος.

[00100]    Τί δὲ εἶπε Μωϋσῆς;

[00101]    Ἐν ἀρχῇ ἐποίησεν ὁ Θεὸς τὸν οὐρανὸν καὶ τὴν γῆν.

[00102]    Τί δὲ ὁ ἁλιεύς;

[00103]    Οὐδαμοῦ τίθησι τὸ, Ἐποίησεν, ἀλλὰ τί;

[00104]    Ἐν ἀρχῇ ἦν ὁ Λόγος καὶ ὁ Λόγος ἦν πρὸς τὸν Θεόν.

[00105]    Ἐκεῖνος ἀπὸ κτισμάτων ἄρχεται, καὶ οὗτος ἀπὸ τοῦ ∆ημιουργοῦ.

[00106]    Ὁρᾷς πῶς ὑψηλότερον ἀναβαίνει Μωϋσέως;

[00107]    Ἤκουσε Μωϋσέως λέγοντος, ὅτι τὸν οὐρανὸν ἐποίησεν ὁ Θεός·

[00108]    ἀφῆκε τὸν οὐρανὸν καὶ ἀνέβη ἀνώτερον Ἀπήντησαν αὐτῷ ἄγγελοι, καὶ παρέδραμεν·

[00109]    ἀρχάγγελοι, καὶ παρῆλθε·

[00110]    τὰ Χερουβὶμ, καὶ οὐκ ἔστη ἐκεῖ.

[00111]    Ποῦ τρέχεις;

[00112]    Ἕτερόν τι ἐπιζητῶ·

[00113]    εἰ δὲ τὰ Χερουβὶμ λάμπῃ, ἀλλ' ἔργα ἐστίν·

[00114]    εἰ δὲ τὰ Σεραφεὶμ ᾄδει, ἀλλὰ σύνδουλά μού εἰσιν.

[00115]    Τί ζητεῖς;

[00116]    Εἰ δὲ Ἀρχαὶ καὶ Κυριότητες, καὶ ταῦτα δοῦλα, καὶ ταῦτα δημιουργήματα·

[00117]    εἰ δὲ Ἐξουσίαι, καὶ ταῦτα ποιήματα.

[00118]    Ποῦ ἀπέρχῃ;

[00119]    Αὐτὸν ζητῶ τὸν ∆ημιουργὸν, αὐτὸν ζητῶ τὸν ὁμοούσιον τῷ Πατρί·

[00120]    οὐκ ἀφίσταμαι ἕως αὐτὸν εὕρω ὡς ἀνθρώπῳ εὑρεῖν δυνατόν.

[00121]    Μωϋσῆς περὶ οὐρανοῦ εἶπε, καὶ ἐπαύσατο·

[00122]    οὐ γὰρ εἶχε τὸ πνεῦμα ὃ ἐγὼ ἔχω·

[00123]    οὐ γὰρ ἔλαβε τὸ πνεῦμα δουλείας εἰς φόβον, ἀλλ' ἔλαβε τὸ πνεῦμα υἱοθεσίας εἰς ὑπακοὴν πίστεως.

[00124]    Μείζονα ἐπιστεύθην ἐγώ.

[00125]    ∆ιὰ τοῦτο ὁ ∆εσπότης μου ἄνωθεν κάτω κατέβη, ἵνα ἐγὼ κάτωθεν ἄνω ἀναβῶ.

[00126]    Τί ζητεῖς;

[00127]    Αὐτὸν τὸν ∆ημιουργόν·

[00128]    ὅταν εὕρω, τότε ἵσταμαι.

[00129]    Ηὗρε, καὶ τί λέγει;

[00130]    Ἐν ἀρχῇ ἦν ὁ Λόγος.

[00131]    Οὐδαμοῦ τὸ, ἐποίησεν, οὐδαμοῦ τὸ ἐγένετο·

[00132]    οὐ γὰρ περὶ δημιουργημάτων ἡ διδασκαλία.

[00133]    Ἰδοὺ Λόγος·

[00134]    Ἐν ἀρχῇ ἦν ὁ Λόγος.

[00135]    Πόσοι τύραννοι ἐξότε ἐφθέγξατο ὁ ἁλιεὺς τὸ ῥῆμα τοῦτο ἀφανίσαι ἤθελον, καὶ οὐκ ἴσχυσαν;

[00136]    ἀλλ', ὅπου ἂν ἀπέλθῃς, ἀκούεις, ὅτι Ἐν ἀρχῇ ἦν ὁ Λόγος·

[00137]    κἂν ἐν χώρᾳ, κἂν ἐν πόλει, προέλαβεν, Ἐν ἀρχῇ ἦν ^[64.27] ὁ Λόγος·

[00138]    καὶ ἐν Περσίδι καὶ ἐν Ἰνδίᾳ καὶ ἐν τῇ Μαυριτανῶν χώρᾳ λάμπει τὸ ῥῆμα τοῦτο ἡλίου φανερώτερον.

[00139]    Ὁ μὲν γὰρ ἥλιος ἐν ἡμέρᾳ φαίνει, ἐν νυκτὶ δὲ κρύπτεται·

[00140]    τὸ δὲ ῥῆμα καὶ ἐν νυκτὶ τὴν ἑαυτοῦ λαμπηδόνα ἀφίησι, τῇ ἑκάστου διανοίᾳ ἐγγέγραπται.

[00141]    Ἀπέθανεν ὁ γράψας, καὶ τὸ ῥῆμα λάμπει·

[00142]    τὸ σῶμα διελύθη τοῦ εἰπόντος;

[00143]    καὶ τὸ ῥῆμα ὑπὲρ τὸν ἥλιον ἀκμάζει.

[00144]    Ὅπου ἂν ἀπέλθῃς, προέλαβε τὸ ῥῆμα, Ἐν ἀρχῇ ἦν ὁ Λόγος.

[00145]    Καὶ ἕκαστος, καὶ γυνὴ καὶ ἀνὴρ, καὶ δοῦλος καὶ ἐλεύθερος, καὶ βασιλεὺς καὶ ἰδιώτης, καὶ ἄρχοντες καὶ ἀρχόμενοι, μελετῶσιν αὐτὸ ἐν τῇ καρδίᾳ, καὶ οὐδεὶς ἐξαλεῖψαι δύναται τὴν καλλίστην ταύτην κληρονομίαν, ἀλλὰ μένει διατηρῶν τὸν πλοῦτον.

[00146]    Ὁ οὐρανὸς καὶ ἡ γῆ παρελεύσονται, οἱ δὲ λόγοι μου οὐ μὴ παρέλθωσι.

[00147]    Ῥῆμα οὐκ ἴσχυσεν ἐξαλεῖψαι ὁ διάβολος·

[00148]    διὰ τί;

[00149]    Ὅτι οὐ ῥῆμα ψιλὸν, ἀλλὰ ῥῆμα Θεοῦ.

[00150]    Μὴ τοίνυν αἰσχύνου ὅταν ἀκούσῃς·

[00151]    Ταῦτα ὁ ἁλιεὺς ἐφθέγξατο, ταῦτα ὁ σαγήνας ῥάπτων.

[00152]    Εἶδες πῶς εἰς αὐτὸν τὸν πυθμένα τῆς πενίας ἐκάθητο καὶ ἀνέβη εἰς τὴν κορυφὴν τῆς ἀρετῆς;

[00153]    Ἀλλ' ἵνα μὴ ἑτέρων ἀρξάμενος, ἐφ' ἕτερα τὸν λόγον ἀγάγωμεν τῇ ῥύμῃ τῶν λεγομένων, τὰ νοήματα ἀφέντες ἐκκυλίεσθαι, φέρε δὴ χαλινῷ τῇ γλώττῃ χρησάμενοι τὴν ὑπόθεσιν ἐπὶ τὴν προτέραν ὑπόσχεσιν ἐπαναγάγωμεν.

[00154]    Τί οὖν φησιν ὁ σκηνοποιὸς, ὁ ἀγοραῖος;

[00155]    οὐ γὰρ παύσομαι συνεχῶς ταῦτα εὐηχῶν τὰ ῥήματα, διὰ τὴν τῶν πολλῶν ἀπόνοιαν καὶ τὴν ἀφιλόσοφον αὐτῶν γνώμην.

[00156]    Ἐπειδὴ γὰρ πολλοὶ κατὰ τὴν ἀγορὰν, ἐπειδὰν ὑβρίσωσι, λέγουσιν, Ἀγοραῖε;

[00157]    τί ἐστιν, Ἀγοραῖε;

[00158]    τί ἐστιν ἀγοραῖος;

[00159]    εἰπέ μοι·

[00160]    μὴ γὰρ ἔγκλημα τὸ εἶναι ἀγοραῖον;

[00161]    μὴ γὰρ ἔγκλημα τὸ ἑστάναι ἐπ' ἀγορᾶς καὶ ἐργάζεσθαι;

[00162]    ἔγκλημα τὸ ἔνδον μένοντα τὰ τῶν ἄλλων ἁρπάζειν.

[00163]    Μάθε τί ὕβρις, καὶ τί ἐγκώμιον, καὶ μὴ καταγέλα·

[00164]    ἀγοραῖον εἶναι οὐκ ἔστιν ἔγκλημα, ἀλλὰ τὸ ἅρπαγα εἶναι, τὸ πλεονέκτην εἶναι.

[00165]    Τί με ὠφελεῖς, ὅτι κάθῃ ἐν θαλάμῳ, καὶ λύκος εἶ;

[00166]    τί δέ με βλάπτει ὁ πένης ἐν ἀγορᾷ ἑστηκὼς καὶ βοῦν καὶ ἀροτῆρα μιμούμενος;

[00167]    Ἀγοραῖος εἶ, χειροτέχνης εἶ;

[00168]    οὐκ ἔστι ταῦτα ἐγκλήματα·

[00169]    ἐγκώμια ταῦτά ἐστιν, ὅτι ἀπὸ δικαίων πόνων τὴν τροφὴν συνάγεις, οὐκ ἀλλοτρίας περιεργαζόμενος οἰκίας.

[00170]    Οὐκ ἔστιν οὖν ἔγκλημα τὸ ἀγοραῖον εἶναι, οὐδὲ τὸ χειροτέχνην εἶναι·

[00171]    ἀλλὰ τί ἐστιν ἔγκλημα;

[00172]    τὸ ἀργῶς ζῇν·

[00173]    εἴθε μὲν οὖν ἀργὸν, καὶ μὴ κακῶς ἐργαζόμενον.

[00174]    Ἀγοραῖος ἦν ὁ Παῦλος, καὶ ἐπ' ἐργαστηρίου εἰστήκει·

[00175]    καὶ οὐκ ἦν πρὸ τοῦ Εὐαγγελίου τοιοῦτος, μετὰ τὸ Εὐαγγέλιον μετεβάλλετο.

[00176]    Ἀλλὰ καὶ ἐκήρυττε καὶ δέρματα ἔραπτεν·

[00177]    ἐκήρυττε καὶ ἔμενε παρὰ Πρισκίλλᾳ καὶ Ἀκύλᾳ, ∆ιὰ τὸ ὁμότεχνον·

[00178]    ἦσαν γὰρ σκηνοποιοὶ τὴν τέχνην.

[00179]    Ὦ φιλοσοφία Παύλου! ὦ φρόνημα ὑψηλὸν, καὶ γνώμη ἀχείρωτος! ὦ διάνοια τῆς ἁψῖδος τοῦ οὐρανοῦ ἁψαμένη! ὦ ψυχὴ πάντων ὑπερορῶσα τῶν ὁρωμένων! ὦ γνώμη! ἀράχνην ἐνόμιζε τοῦ βίου τὰς φαντασίας·

[00180]    οὐκ ἀπῆλθε πρὸς βασιλέας, οὐδὲ ἀπῆλθε πρὸς πλουσίους, οὐκ ἀπῆλθε πρὸς εὐπόρους, ἀλλὰ πρὸς σκηνοποιοὺς ἀπῆλθε διὰ τὸ ὁμότεχνον, καὶ οὐκ ᾐσχύνετο ἐκκαλύπτων ἑαυτοῦ τὸ ἐπιτήδευμα, ἀλλὰ πᾶσι τοῦτο κατάδηλον εἰργάζετο.

[00181]    Ἐν ἀγορᾷ εἱστήκει τὸ Εὐαγγέλιον κηρύττων, νεκροὺς ἐγείρων, λεπροὺς καθαίρων, καὶ οὐκ ᾐσχύνετο τῷ τόπῳ, ἀλλὰ ἐνεκαλλωπίζετο τῷ τρόπῳ, καὶ εἰστήκει ἐν ἀγορᾷ·

[00182]    καὶ ὁ μὲν ἐξεδίδου δέρματα, οἱ δὲ ἔλεγον, Ἀνάστησον τὸν νεκρόν·

[00183]    καὶ εἱστήκεισαν δύο γυναῖκες, ἡ μὲν λέγουσα, Ποίησόν μοι τὸ δέρμα στρῶμα, ἡ δὲ λέγουσα, Ἀνάστησον τὸν υἱόν μου, καὶ ἀμφοτέραις ἀπεκρίνατο·

[00184]    καὶ τοῦτο κώλυμα ἐκείνου οὐκ ἐγίνετο, ἀλλὰ καὶ αἱ χεῖρες εἰργάζοντο, καὶ ἡ χάρις ἐνήργει, καὶ ἀμφοτέραις ἀπεκρίνατο ὁ σκηνοποιὸς, τῇ μὲν τὸ ἀπὸ τῆς τέχνης, τῇ δὲ τὸ ἀπὸ τῆς χάριτος παρέχων.

[00185]    Σὺ τί βούλει;

[00186]    στρῶμα τὸ δέρμα ἐγὼ ποιῶ·

[00187]    δέρματα γὰρ ῥάπτω.

[00188]    Τί βούλει;

[00189]    τὸν νεκρόν σου ἐγερθῆναι ἐγὼ ποιῶ·

[00190]    τὸν Θεὸν γὰρ παρακαλῶ.

[00191]    Μήτε ὄνειδος τέχνη.

[00192]    Οὐκ ἀπῆλθεν εἰς πλουσίαν οἰκίαν καὶ εὔπορον·

[00193]    νόμον γὰρ ἐπλήρου ∆εσποτικὸν λέγοντα·

[00194]    Εἰς ἣν δ' ἂν πόλιν ἢ οἰκίαν εἰσέλθητε, ἐρωτήσατε τίς ἐστιν ἄξιος ἐν αὐτῇ, κἀκεῖ μείνατε.

[00195]    Καὶ γὰρ ἄξιος τοῦ Παύλου ὁ σκηνοποιός;

[00196]    Καὶ πάνυ.

[00197]    ∆ιὰ τί οὔ;

[00198]    ἐπειδὴ σκηνοποιὸς ἦν κατὰ τὴν φιλοπτωχείαν.

[00199]    Εἴπω σοι αὐτοῦ ἐγκώμιον διαδήματος βέλτιον, πορφυρίδος λαμπρότερον;

[00200]    Ἀσπάσασθε Πρισκίλλαν καὶ Ἀκύλαν·

[00201]    καὶ προτίθησι τὴν γυναῖκα τοῦ ἀνδρὸς, ἵνα μάθῃς ὅτι πλείω παρὰ τῇ γυναικὶ ἡ ἀρετή.

[00202]    Ἀσπάσασθε Πρισκίλλαν καὶ Ἀκύλαν, Ῥωμαίοις γράφων, οἵτινες

[00203]    ^[64.28] ὑπὲρ τῆς ἐμῆς ψυχῆς τὸν ἑαυτῶν τράχηλον ὑπέθηκαν.

[00204]    Εἶδες ἐγκώμιον;

[00205]    εἶδες μάρτυρας ζῶντας;

[00206]    Οἵτινες ὑπὲρ τῆς ἐμῆς ψυχῆς τὸν ἑαυτῶν τράχηλον ὑπέθηκαν.

[00207]    Μαρτύριον ἀπηρτισμένον, οὐ τῇ ἐκχύσει τοῦ αἵματος, ἀλλὰ τῇ προαιρέσει τῆς διανοίας.

[00208]    Μή μοι λέγε, Οὐκ ἐσφάγησαν·

[00209]    εἰ γὰρ καὶ μὴ ἐσφάγησαν τῇ πείρᾳ, ἀλλ' ἐσφάγησαν τῇ γνώμῃ·

[00210]    ὁ δὲ Θεὸς οὐ τέλος ἐπιζητεῖ, ἀλλὰ παρασκευήν·

[00211]    ἐπεὶ καὶ ὁ Ἀβραὰμ τὸν υἱὸν ἔσφαξε, καίτοι μὴ σφάξας·

[00212]    καθαρὰ γὰρ ἦν ἡ μάχαιρα·

[00213]    καὶ λέγει·

[00214]    Οὐκ ἐφείσω τοῦ υἱοῦ σου τοῦ ἀγαπητοῦ δι' ἐμέ·

[00215]    οὐκ ἐφείσω τῇ γνώμῃ, ἐγὼ δὲ ἐφεισάμην τῇ πείρᾳ.

[00216]    Οἵτινες ὑπὲρ τῆς ψυχῆς μου τὸν ἑαυτῶν τράχηλον ὑπέθηκαν.

[00217]    Αἵματι τὸν Ἀπόστολον ὑπεδέξαντο.

[00218]    Συνήκατε τί εἶπον;

[00219]    Οὐ γὰρ χοίρους καὶ ὄρνεις αὐτῷ ἔθυσαν, ἀλλὰ τὸ αἷμα τὸ ἑαυτῶν ἐξέχεαν.

[00220]    Ὦ φιλοξενίας ὑπερβολή! ἄλλοι ἐὰν δώσωσι δέκα ὀβολοὺς, σκυλῆναι οὐ καταξιοῦσιν·

[00221]    ἐκεῖνοι τὸ αἷμα ἑαυτῶν ἐξέχεαν, καὶ κατεφρόνησαν τῆς παρούσης ζωῆς.

[00222]    Ὁ φιλόξενος οὕτω φαίνεται, οὐχ ὡς οἱ νῦν, βλοσυρῷ τῷ προσώπῳ, καὶ τὰς ὀφρῦς ἐπαίροντες, ἐὰν δώσωσι πένητι δέκα ὀβολοὺς, καὶ τούτους διὰ τοῦ οἰκέτου.

[00223]    Οὗτοι δὲ οὐχὶ, ἀλλ' αὐτοὶ καὶ οἰκέται ἐγίνοντο.

[00224]    Οὕτω καὶ ὁ Ἀβραὰμ καὶ ἡ Σάῤῥα·

[00225]    καὶ γὰρ ἐκείνη ἐφύρασε τὰ ἄλευρα, οὐ κατὰ τὴν βλακείαν τῶν νῦν γυναικῶν, ἣ τοῖς χρυσίοις καὶ τοῖς ἱματίοις τοῖς σηρικοῖς μαλακωτέραν τὴν φύσιν ἐργάζεται.

[00226]    Ἀλλ' ἐκείνη μυλωθρίδος ἔργα ἐπιτελεῖ·

[00227]    καὶ λέγει αὐτῇ ὁ ἀνήρ·

[00228]    Σπεῦσον καὶ φύρασον τρία μέτρα σεμιδάλεως.

[00229]    Καὶ οὐκ εἶπε·

[00230]    Ταῦτα ἀνεκτά;

[00231]    ἀρτοποιόν με ἔλαβες τὴν συγγενίδα;

[00232]    οὐ προῖκα εἰσήνεγκα;

[00233]    οὐκ ἐλευθέρα εἰμί;

[00234]    τὰ διακόνων μοι ἐπιτάττεις·

[00235]    ἐπὶ ταύταις ταῖς ἐλπίσιν ἦλθόν σου εἰς τὴν οἰκίαν;

[00236]    Οὐδὲν τούτων οὐκ εἶπεν, ἀλλ' ἔσπευσε καὶ ἐφύρασε·

[00237]    γυνὴ γὰρ ἦν τοῦ Ἀβραὰμ, οὐ νόμῳ βίου μόνον, ἀλλὰ καὶ ἀρετῇ κατορθωμάτων.

[00238]    Κοινὴ γενέσθω, φησὶν, ἡ φιλοξενία, κοινῇ καὶ τὸν καρπὸν τρυγήσωμεν.

[00239]    Θησαυρός ἐστι, φησίν·

[00240]    ὁμοῦ μεταλάβωμεν·

[00241]    ἐγὼ τὸν μόσχον, σὺ τὰ ἄλευρα.

[00242]    Ἔθυσε μόσχον, καὶ ἔλαβε τὸν Ἰσαάκ·

[00243]    ἐφύρασε τὰ ἄλευρα, Καὶ ἐγένετο τὸ σπέρμα αὐτῆς ὡς τὰ ἄστρα τοῦ οὐρανοῦ καὶ ὡς ἡ ἄμμος τῆς θαλάσσης.

[00244]    Ταῦτα λέγω τὸν ἀνθρώπινον τῦφον ταπεινῶν, καὶ πάντων τὴν ἀπόνοιαν τῶν πλουτούντων ἐξευτελίζων, καὶ παραμυθούμενος τοὺς πένητας, ἵνα μηδεὶς μήτε ἐν πενίᾳ βαπτίζηται, μήτε ἐν πλούτῳ ἐπαίρηται·

[00245]    ταῦτα δέ ἐστιν ἀμφότερα ἀρετῆς κωλύματα.

[00246]    Ὁ δὲ λογισμὸς κυβερνήτου τάξιν ἐπέχει, οὔτε ὑπὸ τοῦ χειμῶνος βαπτιζόμενος, οὔτε ὑπὸ τῆς γαλήνης χαυνούμενος, ἀλλ' ἐν καιρῷ ἀνωμαλίας τὴν ἴσην αὐτῷ φιλοσοφίαν διατηρῶν, μηδέπω τῇ διαφορᾷ σαλευόμενος, καὶ τοῦτο ἢ ἐκεῖνο γινόμενος·

[00247]    ὥσπερ οὖν ὁ Ἰὼβ οὔτε ἐν τῇ πενίᾳ ἐγένετο βλάσφημος, οὔτε ἐν τῷ πλούτῳ ἐπηρμένος, ἀλλ' ὅτε μὲν ἦν πλούσιος, τὴν θύραν ἠνέῳξεν, ὅτε δὲ πένης ἐγένετο, τὰς πλευρὰς τὰς ἑαυτοῦ ἤνοιξε τότε μὲν οὖν φιλόπτωχος, ὕστερον δὲ φιλόσοφος γινόμενος, καὶ καταπατῶν τὴν διαφορὰν τῶν βιωτικῶν πραγμάτων.

[00248]    Ἀλλ' ἐπειδὴ τοσαῦτα περὶ τοῦ σκηνοποιοῦ, φέρε καὶ τῶν εἰρημένων ἔνια μεταχειρισώμεθα, ὀλίγα μὲν οὖν ῥήματα εἰς μέσον ἄγοντες, πέλαγος δὲ ἀχανὲς νοημάτων ἡμῖν ἀνοίγοντες.

[00249]    Τοιοῦτος γὰρ ὁ θησαυρὸς τῶν Γραφῶν·

[00250]    οὐ τῷ πλήθει τῶν ῥημάτων, ἀλλὰ τῇ δυνάμει τῶν νοημάτων τὴν εὐπορίαν ὑμῖν ἐνδείκνυνται.

[00251]    Τί οὖν φησιν ὁ σκηνοποιὸς, τὸ στόμα τῆς ἁγιωσύνης ἐμπεπλησμένον, ἡ γλῶττα ἡ τῷ θανάτῳ φοβερά;

[00252]    τί γράφει ἡ δεξιὰ ἐκείνη ἡ ἁλύσει καλλωπιζομένη καὶ δεσμὰ περιβεβλημένη, καὶ νεκροὺς ἐγείρουσα;

[00253]    τί γράφει·

[00254]    τί λέγει ἡ γλῶττα;

[00255]    τί γράφει ἡ δεξιά;

[00256]    Ἡμεῖς δὲ, εἰ καὶ ἐγνώκαμεν κατὰ σάρκα Χριστὸν, ἀλλὰ νῦν οὐκέτι γινώσκομεν.

[00257]    Ὥστε εἴ τις ἐν Χριστῷ, καινὴ κτίσις.

[00258]    Πρόσεχε, εἰς βάθος καταβαίνομεν.

[00259]    Ὥστε εἴ τις ἐν Χριστῷ, καινὴ κτίσις·

[00260]    τὰ ἀρχαῖα παρῆλθεν, ἰδοὺ γέγονε τὰ πάντα καινὰ, τὰ δὲ πάντα ἐκ τοῦ Θεοῦ.

[00261]    Θησαυρὸς μὲν οὖν κεκρυμμένος, ἀλλ' ἀνορύττωμεν καὶ τὰ βάθη πρὸς τὸ βάθος·

[00262]    οὐ γάρ ἐστι βυθὸς ζόφον ἔχων, ἀλλὰ βυθὸς φῶς βρύων.

[00263]    Εἰ καὶ ἀσαφὴς ὁ λόγος, ἀλλὰ πειράσομαι αὐτὸν εὔκολον ποιῆσαι καὶ ἰδιώτῃ καὶ πένητι καὶ οἰκέτῃ καὶ μαγείρῳ καὶ ναύτῃ καὶ γυναικὶ καὶ ἐλευθέρῳ καὶ δούλω.

[00264]    Τὰ γὰρ τοῦ Θεοῦ κοινῇ πρόκειται πᾶσιν ἀσαφείᾳ συσκιαζόμενα, ἀλλὰ τῇ ἑρμηνείᾳ εὐκατάληπτα γιγνόμενα.

[00265]    Εἰ δέ τίς ἐστι βραδύτης, τῇ εὐκολίᾳ τῆς διδασκαλία·

[00266]    σαφεστέραν ποιήσομαι τὴν τράπεζαν·

[00267]    μόνον μοι παρά ^[64.29] σχετε διάνοιαν συντεταμένην, καὶ μηδὲν μαλακίζεσθε ^[64.29] πεῖραν γὰρ ἔλαβον ὑμῶν τῆς ὑπακοῆς τῆς κατὰ τὴν διάνοιαν.

[00268]    ∆ιὸ καὶ πολλάκις δυσκόλοις ἐπεχείρησα νοήμασιν, οὐ προσδοκήσας αὐτὰ εὔληπτα ἔσεσθαι, ἀπὸ δὲ τῆς σπουδῆς τῆς κατὰ τὴν ἀκρόασιν ἰδὼν τὰ δύσκολα ῥᾴδια γενόμενα.

[00269]    Νήφουσα ἔστω ἡ διάνοια, καὶ οὐδὲν δύσκολον, συντεταμένη γνώμη, καὶ πάντα σαφῆ.

[00270]    Ὥστε εἴ τις ἐν Χριστῷ, καινὴ κτίσις·

[00271]    τὰ ἀρχαῖα παρῆλθε.

[00272]    Ταῦτα ἀναγινώσκοντες Ἕλληνες γελῶσι καὶ κωμῳδοῦσιν ἡμᾶς·

[00273]    τοιαῦτα, φησὶ, Παῦλος λέγει·

[00274]    Εἴ τις ἐν Χριστῷ, καινὴ κτίσις.

[00275]    Κομπάζεις, ὦ Παῦλε (τὰ ἐκείνων λέγω), φύσας ἡμᾶς ταῖς ἐλπίσιν·

[00276]    ἐπῆρες ἡμῶν τὴν διάνοιαν, καινῆς ἐννοίας τὰς ἀκοὰς ἡμῶν πληροῖς·

[00277]    Εἴ τις ἐν Χριστῷ, καινὴ κτίσις.

[00278]    Μάθε πρῶτον μὴ ἁπλῶς τετυφλῶσθαι·

[00279]    εἰς βάραθρον ἐμβάλλεις σαυτόν.

[00280]    Μὴ γὰρ οἶδας τί ἤκουσας·

[00281]    Ψυχικὸς γὰρ ἄνθρωπος οὐ δέχεται τὰ τοῦ πνεύματος·

[00282]    μωρία γὰρ αὐτῷ ἐστι.

[00283]    Μὴ γὰρ οἶδας τὸν θησαυρόν;

[00284]    ὁ θησαυρὸς ἄνωθεν ἀκάνθας ἔχει καὶ λίθους, ἀλλ' ὅταν διασκαφῇ, κάτω μαργαρῖται εὑρίσκονται.

[00285]    Μή μοι τὰ ῥήματα ἁπλῶς, ἀλλὰ τὰ νοήματα·

[00286]    μή μοι τὰ ῥήματα·

[00287]    μετὰ ἀσφαλείας μάνθανε τί ἐστι Καινὴ κτίσις, μάνθανε τί Ἐν Χριστῷ·

[00288]    μάθε καὶ κατάβηθι εἰς φῶς·

[00289]    ἐπεὶ καὶ παιδίον πολλάκις ὁρᾷ βασιλέα παριόντα καὶ γελᾷ, καὶ ὁρᾷ βασιλεὺς καὶ οὐ μέλει αὐτῷ·

[00290]    οὐ γὰρ τοῦ βασιλέως ὁ ψόγος, ἀλλὰ τοῦ ἀτελοῦς τῆς ἡλικίας τὸ ἐλάττωμα.

[00291]    ∆εῦρο εἰσαγάγω σε εἰς τὰ ἄδυτα·

[00292]    μὴ ἁπλῶς ἀπὸ τῶν προπυλαίων θεώρει·

[00293]    δεῦρο ἀνακαλύψω σοι πᾶν τὸ ἀπόῤῥητον τῶν μυστηρίων.

[00294]    Καὶ τί μοι, φησὶν, ἔχεις εἰπεῖν;

[00295]    οὐκ εἶπεν ὅτι Καινὴ κτίσις ἐστὶ παρὰ Χριστιανοῖς;

[00296]    Πάνυ.

[00297]    ∆εῖξον οὖν μοι, φησὶ, καινὴν κτίσιν·

[00298]    δεῖξόν μοι ὅτι καινὸς οὐρανὸς ἐγένετο, ὅτι πρὸ μὲν τοῦ παραγενέσθαι τὸν Χριστὸν ἄλλος ἦν, μετὰ δὲ ταῦτα ἄλλος ἐγένετο·

[00299]    ὅτι θάλαττα ἄλλη, ὅτι σπέρματα ἄλλα, ὅτι φύσις ἄλλη, ὅτι καρπὸς ἄλλος, ὅτι ποταμοὶ ἄλλοι, ὅτι ἄνεμοι ἄλλοι·

[00300]    ταῦτα γὰρ πάντα ἀρχαῖα, καὶ σὺ λέγεις ὅτι καινὴ κτίσις;

[00301]    Ἀνάσχου, μὴ μαίνου·

[00302]    ὅσῳ ἀντιλέγεις, τοσοῦτον μᾶλλον βρύει τῆς ἀληθείας ἡ ὑπερβολή.

[00303]    Μὴ μαίνομαι;

[00304]    φησὶ, μὴ ἀντιλέγω;

[00305]    ἴδε ἡσυχάζω.

[00306]    Ἡσύχασον·

[00307]    ἐρωτήσω σε.

[00308]    Ἐρώτησον.

[00309]    Λέγει, πρὶν ἢ παραγενέσθαι τὸν Χριστὸν, ἄλλος ἦν ὁ οὐρανὸς, μετὰ δὲ τὸ παραγενέσθαι ἄλλος ἐγένετο;

[00310]    καὶ πρὶν ἢ παραγενέσθαι αὐτὸν κατὰ σάρκα ὁ αὐτὸς οὐρανὸς ἦν, καὶ μετὰ τὸ παραγενέσθαι αὐτὸν ὁ αὐτὸς ἔμεινεν οὐρανὸς καὶ γῆ καὶ θάλασσα καὶ ὁ ἀὴρ καὶ οἱ ἄνεμοι, Τί οὖν, φησὶ, κομπάζει Παῦλος λέγων·

[00311]    Εἴ τις ἐν Χριστῷ, καινὴ κτίσις·

[00312]    τὰ ἀρχαῖα παρῆλθεν, ἰδοὺ γέγονε καινὰ τὰ πάντα;

[00313]    Ἐγὼ, φησὶ, καινὸν οὐδὲν βλέπω.

[00314]    Οὐ γὰρ ἔχεις ὀφθαλμοὺς ἵνα ἴδῃς·

[00315]    δεῦρο, ποιήσω σοι ὀφθαλμοὺς καὶ ὁρᾷς.

[00316]    Καὶ ὀφθαλμοὺς ποιεῖς;

[00317]    Πάνυ.

[00318]    Καὶ δημιουργὸς εἶ;

[00319]    Πάνυ.

[00320]    Σὺ ἀπονενόησαι;

[00321]    Οὐχί.

[00322]    Οὐκοῦν ποίησον ὀφθαλμοὺς τοῦ σώματος.

[00323]    Ἀλλὰ τὸ μεῖζον, τῆς διανοίας.

[00324]    Καὶ ποιεῖς μοι ὀφθαλμούς;

[00325]    Πάνυ.

[00326]    Οὐ γὰρ ἔχω;

[00327]    Οὐχί.

[00328]    Ἐπεὶ σὺ ὀφθαλμοὺς ἔχεις, ἐπεὶ ἐγὼ οὐκ ἔχω·

[00329]    πῶς;

[00330]    εἰπέ μοι.

[00331]    Ὅταν ἀπέλθῃς εἰς ναὸν, καὶ ἴδῃς ἐκεῖ ξόανον γυμνὸν, λίθον ἄφωνον, καὶ εἴπῃς·

[00332]    Οὗτος ὁ θεός ἐστιν, ὀφθαλμοὺς ἔχεις;

[00333]    ὅταν τὸν λίθον θεὸν καλεῖς, πῶς ἔχεις ὀφθαλμούς;

[00334]    μήτι ὄφελος τῶν ἔξωθεν ὀφθαλμῶν, τῶν ἔνδοθεν πεπηρωμένων;

[00335]    Ὁρᾷς ὅτι χρείαν ἔχεις ἵνα ποιήσω σοι ὀφθαλμοὺς, ἵνα ἴδῃς τὸν λίθον ὡς λίθον, ἵνα μὴ τὰ ἄμικτα μίξῃς, ἵνα μὴ τὰ διεστῶτα συναγάγῃς;

[00336]    Ὀφθαλμοὺς ἔχεις, ὅταν ἴδῃς ξύλον καὶ προσκυνύσῃς, καὶ λαβὼν ἐγὼ αὐτὸ καύσω, μὴ ἔχεις ὀφθαλμοὺς τὸ καιόμενον θεὸν ὀνομάζων, ὅταν τὰ πάθη θεοποιεῖς;

[00337]    Μεθύει ἄνθρωπος καὶ περιφέρεται, καὶ γίνεται ἀντὶ ἀνθρώπου ἄλογον ἀπὸ τῆς μέθης·

[00338]    σὺ δὲ λέγεις ἡ μέθη θεὸς, καὶ καλεῖς αὐτὸν ∆ιόνυσον·

[00339]    ἡ πορνεία θεὸς, καὶ καλεῖς αὐτὸν Ἑρμῆν.

[00340]    Ὅταν οὖν τὰ πάθη καὶ ξύλα θεοποιεῖς, πῶς ἔχεις ὀφθαλμούς;

[00341]    τὰ ὁρώμενα οὐ βλέπεις, καὶ τὰ μὴ ὁρώμενά σοι ἔχω πιστεῦσαι;

[00342]    Ὁρᾷς ὅτι χρεία σοι ὀφθαλμῶν;

[00343]    Ὁ ∆ιόνυσος λίθος ἐστὶ σαθρὸς, καὶ ἡ Ἀφροδίτη ξύλον ἐστίν.

[00344]    Οὐ πιστεύεις μου τοῖς λόγοις;

[00345]    πίστευσον τῷ πελέκει·

[00346]    ὠθῶ αὐτὸ, καὶ ῥίπτω·

[00347]    δός μοι πῦρ, καὶ καίω.

[00348]    Τοῦτο μέθης ἐστὶ πάθος·

[00349]    ὁ νόμος αὐτὰ κολάζει, καὶ σὺ αὐτὰ θεοποιεῖς;

[00350]    μὴ ἔχεις ὀφθαλμούς;

[00351]    Ὁρᾷς ὅτι χρεία ἵνα ὀφθαλμούς σοι ποιήσω διὰ τοῦ λόγου;

[00352]    Ἐπεὶ καὶ Ἰουδαῖοι τοιοῦτοι ἦσαν·

[00353]    ὀφθαλμοὺς εἶχον, καὶ οὐκ ἔβλεπον·

[00354]    ὁ τυφλὸς οὐκ εἶχε, καὶ ἔβλεπε.

[00355]    Λέγει τῷ τυφλῷ ὁ Χριστὸς, Πιστεύεις σὺ εἰς τὸν Υἱὸν τοῦ Θεοῦ;

[00356]    καὶ λέγει·

[00357]    Πιστεύω, καὶ προσεκύνησεν·

[00358]    οἱ δὲ Ἰουδαῖοι βλέπον ^[64.30] τες ἐσταύρωσαν.

[00359]    Ὁ τυφλὸς προσκυνεῖ, καὶ ὁ βλέπων σταυροῖ·

[00360]    διὰ τοῦτο λέγει·

[00361]    Εἰς κρῖμα ἐγὼ ἦλθον εἰς τὸν κόσμον τοῦτον, ἵνα οἱ μὴ βλέποντες βλέψωσι, καὶ οἱ βλέποντες τυφλοὶ γένωνται.

[00362]    Μήτι ἔχεις ὀφθαλμούς;

[00363]    Θέλεις οὖν κατασκευάσω σοι ὀφθαλμοὺς διὰ τοῦ λόγου, ὀφθαλμοὺς συνέσεως, ὀφθαλμοὺς ἀόρατα βλέποντας;

[00364]    Τοιοῦτοι γὰρ οἱ ὀφθαλμοὶ τῶν πίστει ὁρώντων ἡμῶν·

[00365]    οὐ τὰ βλεπόμενα ὁρῶσιν, ἀλλὰ τὰ μὴ βλεπόμενα.

[00366]    Κἂν μὲν θελήσῃς παρακολουθῆσαι, παρακολούθει·

[00367]    ἐὰν δὲ μὴ θελήσῃς, ἐγὼ τὸ ἐμὸν ποιῶ, παιδεύω.

[00368]    Ποικίλος γὰρ ὁ λόγος, ἐναντίους μεταβάλλων, τοὺς οἰκείους διορθῶν, καὶ πολυπρόσωπος καὶ πάντοθεν ἀπηρτισμένος.

[00369]    Ὥστε εἴ τις ἐν Χριστῷ, καινὴ κτίσις·

[00370]    τὰ ἀρχαῖα παρῆλθεν, ἰδοὺ γέγονε καινὰ τὰ πάντα.

[00371]    Ὦ στόμα! ὦ λαμπηδών! ἐγὼ γὰρ βλέπω τὸν θησαυρὸν, πρὶν ἢ αὐτὸν ἀνακαλύψω·

[00372]    βλέπω τὸ σκεῦος ὅλον τοῦ ∆ημιουργοῦ.

[00373]    Ὦ ὀφθαλμοὶ, οἷα βλέπουσι! Πρός με σύντεινον σαυτὸν, διανάστηθι.

[00374]    Κτίσις, ἐν τῇ Γραφῇ καλεῖται οὐ μόνον ἡ ἐκ τοῦ μὴ ὄντος εἰς τὸ εἶναι παραγωγὴ, ἀλλὰ καὶ ἡ τοῦ ὄντος ἐπὶ τὸ βέλτιον μεταβολή.

[00375]    Λέγεται μὲν συντόμως, δεῖ δὲ αὐτὸ ῥηθῆναι καὶ σαφέστερον.

[00376]    Λέγεται κτίζειν ὁ Θεὸς, οὐχ ὅταν τὸ μὴ ὂν ἐργάσηται μόνον, ἀλλ' ὅταν καὶ τὸ ὂν ἐνδιεστραμμένον ἢ ῥυπωθὲν διορθώσῃ καὶ καθάρῃ.

[00377]    Οἷόν τι λέγω·

[00378]    Ἔκτισεν ὁ Θεὸς τὸν ἄνθρωπον, τοῦτό ἐστι τὸ μὴ ὂν ἐργάσασθαι·

[00379]    καὶ ὅταν τὸν πονηρὸν ἄνθρωπον καλὸν ἐργάσηται, ὧδε πραγμάτων ἐπὶ τὸ βέλτιον μεταβολή·

[00380]    ἐκεῖ τοῦ μὴ ὄντος παραγωγὴ, ὧδε τοῦ ὄντος, ἀπολλυμένου δὲ ἐπὶ τὸ βέλτιον μεταβολή.

[00381]    Καὶ ἵνα μάθῃς, ὅτι κτίσις λέγεται οὐ μόνον ἡ ἐκ τοῦ μὴ ὄντος εἰς τὸ εἶναι παραγωγὴ, ἀλλ' ὅταν τι ῥυπωθὲν καὶ διαστραφὲν διορθώσῃ καὶ καθάρῃ, ἄκουσον τοῦ ∆αυῒδ λέγοντος.

[00382]    Ἐπειδὴ γὰρ ἦν αὐτὸς καὶ ἡ καρδία αὐτοῦ κτισθεῖσα, ἦν δὲ ῥυπωθεῖσα ὑπὸ τῆς μοιχείας καὶ τοῦ φόνου·

[00383]    παρακαλεῖ οὖν τὸν Θεὸν καὶ λέγει·

[00384]    Καρδίαν καθαρὰν κτίσον ἐν ἐμοὶ, ὁ Θεός.

[00385]    Πρὸ οὖν τούτου ἀκάρδιος ἦν;

[00386]    πῶς οὖν τὸν Γολιὰθ κατήνεγκε;

[00387]    πῶς δὲ τῷ Θεῷ εὐηρέστει;

[00388]    Οὐ περὶ τῆς οὐσίας τῆς καρδίας λέγει, ἀλλὰ περὶ τῆς ἀρίστης πολιτείας.

[00389]    Ἰδοὺ τοίνυν ἡ κτίσις λέγεται, οὐχὶ ἡ ἐκ τοῦ μὴ ὄντος εἰς τὸ εἶναι παραγωγὴ τῆς οὐσίας, ἀλλὰ καὶ τῆς οὔσης, διεφθαρμένης δὲ, εἰς τὸ βέλτιον μεταβολή.

[00390]    Ὅταν ἴδῃς τινὰ ἀκόλαστον σώφρονα γενόμενον, εἰπὲ, Ἐκτίσθη αὐτῷ ἡ διάνοια·

[00391]    ὅταν ἴδῃς πόρνην σωφρονοῦσαν, εἰπὲ, Ἐκτίσθη αὐτῆς ἡ διάνοια·

[00392]    ὅταν ἴδῃς ἅρπαγα ἐλεήμονα γενόμενον, εἰπὲ, Ἐκτίσθη αὐτοῦ ἡ καρδία·

[00393]    ὁ γὰρ λύκος ἐγένετο πρόβατον, ὁ ἱέραξ ἐγένετο περιστερά.

[00394]    ∆ιὰ τοῦτο κτίσις.

[00395]    ∆ιὰ τοῦτο καὶ τὸ λουτρὸν κτίσμα λέγεται τὸ τῆς παλιγγενεσίας.

[00396]    Ἀποδυόμενοι γὰρ, φησὶ, τὸν παλαιὸν ἄνθρωπον, τὸν φθειρόμενον, κατὰ τὴν ἐπιθυμίαν τῆς σαρκὸς αὐτοῦ, ἐνδυόμενοι δὲ τὸν νέον ἄνθρωπον, τὸν γενόμενον κατ' εἰκόνα τοῦ Κτίσαντος αὐτόν.

[00397]    Ὥστε κτίσις αὐτοῦ ἐστι τὸ ποίημα·

[00398]    κτισθέντες γὰρ ἐν Χριστῷ Ἰησοῦ ἐπὶ ἔργοις ἀγαθοῖς·

[00399]    πρῶτα μὲν ἔργοις φθαρτοῖς.

[00400]    Τότε ἔλαβεν ὁ Πατὴρ πηλὸν, καὶ ἐποίησε τὸν ἄνθρωπον·

[00401]    λαμβάνει ὁ Υἱὸς ὕδωρ, καὶ ποιεῖ αὐτὸ οἶνον.

[00402]    Κἀκεῖ ἔχει στοιχεῖον, καὶ ὧδε στοιχεῖον·

[00403]    ἐναλλαγὴ στοιχείου, καὶ βελτίων ἡ δημιουργία.

[00404]    Ὥστε, εἴ τις ἐν Χριστῷ, καινὴ κτίσις.

[00405]    Ὁρᾷς οὖν ὅτι ἔστι καινὴ κτίσις;

[00406]    τί γάρ μοι ὄφελος ἐὰν γένηται οὐρανός;

[00407]    Πρόσεχε μετὰ ἀκριβείας·

[00408]    Οὐκ ἐγένετο οὐρανὸς καινὸς, οὐδὲ ἥλιος καινὸς, οὐδὲ γῆ.

[00409]    Τί γάρ μοι ὄφελος, εἰ οὐρανὸς ἐγένετο καινὸς, ἐγὼ δὲ ἔμελλον ἐν ἁμαρτίαις εἶναι;

[00410]    τί με ὠφελεῖ ἢ βλάπτει με ὁ οὐρανὸς μένων, ὅταν ἐγὼ μὴ μένω ὁ αὐτός;

[00411]    Ὁ οὐρανὸς οἶκός ἐστιν, ἐγὼ δὲ νοσηρός εἰμι.

[00412]    Ἐὰν οὖν ἴδῃς ἰατρὸν εἰσελθόντα εἰς τὴν οἰκίαν, καὶ τοῦ μὲν νοσηροῦ μηδεμίαν πρόνοιαν ποιούμενον, λευκαίνοντα δὲ τοὺς τοίχους, χρυσοῦντα τὸν ὄροφον, οὐ λέγεις, Ἄνθρωπε, ἀνάστησον τὸν νοσοῦντα;

[00413]    τί τὴν οἰκίαν καλλωπίζεις;

[00414]    Καὶ ὁ Χριστὸς εἰσῆλθεν εἰς τὸν κόσμον τοῦτον, εἰς ὃν κατακειμένην ηὗρε τὴν φύσιν μου νοσοῦσαν.

[00415]    Πρόσεχε πάλιν ᾧ λέγω·

[00416]    Εἰσέρχεται ἰατρὸς εἰς οἶκον μέγαν, εὑρίσκει νοσοῦντα ἄνθρωπον, πυρέττοντα, ἕλκη ἔχοντα·

[00417]    ἀφίησι τὸν νοσοῦντα καὶ ἐγείρεται;

[00418]    λευκαίνει τοὺς τοίχους;

[00419]    χρυσοῖ τὸν ὄροφον;

[00420]    τὸ ἔδαφος καλλωπίζει;

[00421]    Οὐχί·

[00422]    ἀλλὰ τοῦ μὲν οἴκου οὐδένα ποιεῖται λόγον, ὅλῃ δὲ σπουδῇ κέχρηται πρὸς τὸν νοσοῦντα.

[00423]    Ἐὰν ὁ οἰκοδεσπότης ὑγιαίνῃ, καὶ τὰ ἄλλα ἕπεται.

[00424]    Οὕτω καὶ ἐνταῦθα.

[00425]    Εἰσῆλθεν εἰς τὸν κόσμον ὁ Χριστός·

[00426]    σάρκα ἀνέλαβε, πανταχοῦ δὲ πάρεστιν ἀεί·

[00427]    εἴσοδον δὲ αὐτοῦ τὴν οἰκονομίαν καλεῖ ^[64.31] ἡ Γραφή.

[00428]    Εἰσῆλθεν εἰς τὸν κόσμον τοῦτον τὸν μέγαν, ὃν αὐτὸς κατεσκεύασεν·

[00429]    ηὗρε νοσοῦσαν τὴν φύσιν τῶν ἀνθρώπων, νοσοῦσαν, οὐκ ἐπὶ κλίνης κειμένην, ἀλλ' ἐπὶ κακίας ἐῤῥιμμένην, τὸ κοινὸν μέλος διεφθαρμένον, βωμοὺς ἀναπτομένους, κνίσσαν τὸν ἀέρα μολύνουσαν, τέκνα σφαττόμενα παρὰ γονέων, τὴν φύσιν πατουμένην, τοὺς νόμους τῆς οὐσίας σαλευομένους, τὴν συμπάθειαν ἀτιμαζομένην·

[00430]    Ἔθυσαν υἱοὺς αὐτῶν καὶ θυγατέρας τοῖς δαιμονίοις·

[00431]    ἐκβακχευομένους τοὺς ἀνθρώπους ἀκολάστως, τὸν μὲν πόρνον, τὸν δὲ μοιχὸν, τὸν δὲ ἀνδροφόνον, τὴν γῆν ἅπασαν ἀπολλυμένην, τῶν ἀνθρώπων κειμένων ἐν τῇ κλίνῃ τῆς πονηρίας, τὸν διάβολον παραμένοντα, ἀνάπτοντα τὴν κάμινον, ἐμπιπλῶντα τὰ ἕλκη, τοὺς ἰατροὺς ἀτονοῦντας, τοὺς προφήτας λέγω, κατηγοροῦντας, οὐ διορθωμένους, τοὺς ἰατροὺς παρακαθημένους, φάρμακα κατασκευάζοντας, οὐκ ὠφελοῦντας δὲ, κατηγοροῦντας δὲ ἅπαντας.

[00432]    Οὐκ ἔστι δίκαιος οὐδὲ εἷς, οὐκ ἔστιν ὁ ἐκζητῶν τὸν Θεόν.

[00433]    Ὁ ἰατρὸς ταῦτα;

[00434]    Ποία οὖν ἐλπὶς, ὅτε ἰατρὸς κατηγορεῖ τοῦ κάμνοντος;

[00435]    Ὁ μὲν ἔλεγεν·

[00436]    Ἵπποι θηλυμανεῖς ἐγένοντο, ἕκαστος εἰς τὴν γυναῖκα τοῦ πλησίον αὐτοῦ ἐχρεμέτιζεν.

[00437]    Ἄλλος ἐκάθισεν ἐν τῇ ἐρήμῳ, ὡς ἡ κορώνη·

[00438]    Οἴμοι, ὅτι ἀπόλωλεν εὐλαβὴς ἀπὸ τῆς γῆς, καὶ ὁ κατορθῶν ἐν ἀνθρώποις οὐχ ὑπάρχει·

[00439]    ἄλλος·

[00440]    Ἀρὰ καὶ ψεῦδος καὶ κλοπὴ καὶ μοιχεία κέχυται ἐπὶ τῆς γῆς·

[00441]    ἕκαστος τὸν πλησίον αὐτοῦ ἐκθλίβουσιν ἐκθλιβῇ·

[00442]    ἄλλος·

[00443]    Οὐαὶ ἔθνος ἁμαρτωλῶν.

[00444]    Ἐξέρχεται ὁ ἰατρὸς κλαίων·

[00445]    ποίαν δὲ ἐλπίδα ἔχει ὁ νοσῶν, ὅταν ἴδῃ τὸν ἰατρὸν κλαίοντα;

[00446]    ποίαν ἐλπίδα ἔχεις, ὅταν ἴδῃς τὸν ἀπεγνωκότα;

[00447]    τί ἔχεις χρηστὸν προσδοκῆσαι περὶ τοῦ νοσοῦντος;

[00448]    Καίτοι ἰατροὶ πολλάκις, καὶ εἰδότες τὴν τελευταίαν, ὥστε μὴ λυπῆσαι τοὺς προσήκοντας, τῇ φιλοσοφίᾳ νικῶσι τὸ πάθος, καὶ φαιδρὸν ἐπιδείκνυνται τὸ πρόσωπον τῆς ἑαυτῶν ὑπολήψεως, ἵνα μὴ καταβάλωσι τὰ φρονήματα τῶν νοσούντων.

[00449]    Ὅταν γὰρ ὁ νοσῶν ἴδῃ διαστρέφοντα τὴν ὄψιν τὸν ἰατρὸν, τί ἔχει χρηστὸν ἐλπίσαι;

[00450]    Ὧδε δὲ οὕτως ἐνίκησε τὸ νόσημα, ὡς αὐτὸν τὸν ἰατρὸν κλαίειν·

[00451]    τί ἔχω ποιῆσαι;

[00452]    ἕλκη, σηπεδὼν, σκώληκες, μυρία κακά.

[00453]    Οὐαὶ ἔθνος ἁμαρτωλόν! Ὁ δὲ ἄλλος καὶ θρήνους ὁλοκλήρους ἔγραψεν, ὁ Ἱερεμίας·

[00454]    ὁ μὲν πενθεῖ, ὁ δὲ θρηνεῖ, ὁ δὲ παρακαλεῖ·

[00455]    ὁ Θεὸς ἄνωθεν·

[00456]    Ἐγκαταλέλοιπα τὸν οἶκόν μου.

[00457]    Ποία ἐλπὶς λοιπὸν, ὅταν ὁ Θεὸς λέγῃ, Ἐγκαταλέλοιπα τὰ σύμπαντα, ἀφῆκα τὴν κληρονομίαν μου, ἔδωκα τὴν ἠγαπημένην ψυχήν μου εἰς χεῖρας ἐχθρῶν μου;

[00458]    Ὁ Ἠλίας κάτωθεν·

[00459]    Κύριε, τὰ θυσιαστήριά σου κατέσκαψαν, καὶ τοὺς προφήτας σου ἀπέκτειναν, κἀγὼ ὑπελείφθην μονώτατος, καὶ ζητοῦσι τὴν ψυχήν μου.

[00460]    Εἰ δὲ ἐν τῇ Ἰουδαίᾳ ταῦτα, ὅπου νόμος, ὅπου ναὸς, ὅπου κιβωτὸς, ὅπου θυσία Ἰουδαϊκή·

[00461]    τί ἦν ὅπου εἴδωλα, ὅπου κνίσσα καὶ καπνὸς, παράνομοι τελεταὶ, ἀσέβειαι·

[00462]    ὅπου τὰ πάθη ἐθεοποιεῖτο, ὅπου κυνῶν φωνὴν ἐμιμοῦντο, οἵτινες ἐπὶ τοῦ ∆ιονύσου ὠργιάζοντο δέρμα αἰγῶν καὶ κυνῶν φωνὴν, ἵνα πάντοθεν τὴν εὐγένειαν ἀπολέσωσι;

[00463]    Κύνας, χοίρους ἐποίησεν ὁ διάβολος, ἔχεις ἐποίησεν, ὄφεις εἰργάσατο, ἀσπίδας κατεσκεύασε λευκούς.

[00464]    Ὁ νόμος ἀτονεῖ, οἱ προφῆται κατηγοροῦσι.

[00465]    Τί οὖν, ἄθλιε;

[00466]    εἰσελθὼν καὶ εὑρὼν τὴν οἰκουμένην οὕτω κακουμένην, ἔμελλε τὸν οὐρανὸν καλλωπίζειν, καὶ ἀφιέναι τὸν νοσηρόν;

[00467]    Ἀλλ' οὐκ ἐποίησε τοῦτο, ἀλλ' ἔδραμεν ἐπὶ τὸν νοσοῦντα, δι' ὃν καὶ οὐρανὸς, δι' ὃν καὶ γῆ καὶ θάλαττα καὶ ἀὴρ καὶ τὰ ἄλλα πάντα.

[00468]    ∆ιὰ τοῦτο οὐδὲ οὐρανοῦ σχῆμα ἀνέλαβεν·

[00469]    οὐ γὰρ οὐρανὸν ἔμελλε θεραπεύειν, ἀλλ' ἄνθρωπον.

[00470]    ∆ιὰ τοῦτο τοῦ νοσοῦντος τὸ συγγενὲς ἀνεκτήσατο, καὶ ἔρχεται ὡς αὐτὸς ἐκεῖνος ὁ νοσῶν, οὐ νοσῶν αὐτός·

[00471]    Ἁμαρτίαν γὰρ οὐκ ἐποίησεν, οὐδὲ δόλος εὑρέθη ἐν τῷ στόματι αὐτοῦ·

[00472]    ἀλλ' ἦλθε συγγενὲς ἔχων τῆς ἐκείνου φύσεως σκεῦος.

[00473]    Οὐκ ἦλθε γυμνῇ τῇ θεότητι, ἵνα μὴ φύγῃ ὁ νοσῶν, ἵνα μὴ σοβήσῃ τὴν θήραν·

[00474]    ἀλλ' ὥσπερ ἰατρὸς πολλάκις εὐγενὴς ὢν καὶ ἐπιφανὴς, προγόνων ἔχων περιφάνειαν, καὶ σηρικὰ περιβεβλημένος ἱμάτια, ἐπειδὰν εἰσέλθῃ πρὸς πτωχὸν νοσοῦντα δεόμενον χειρουργηθῆναι, ἢ ἄλλο τι, ἀποδύεται τὰ ἱμάτια καὶ ἀφίησι τὴν περιφάνειαν καὶ λαμβάνει λέντιον, καὶ διαζώννυσιν ἑαυτὸν, μέλλων καίειν, μέλλων τέμνειν, καὶ οὐ ζητεῖ τὴν ἑαυτοῦ ἀξίαν, ἀλλὰ τὴν κηδεμονίαν τοῦ κάμνοντος·

[00475]    οὕτω καὶ ὁ ∆εσπότης τῶν ἀγγέλων ἐποίησεν, οὗ ἡ δόξα ἀνερμήνευτος·

[00476]    κατέβη ὡς ἄνθρωπος, διέζωσεν ἑαυτὸν λέντιον, διέζωσεν ἑαυτὸν, τὴν φύσιν τὴν ἡμετέραν,

[00477]    ^[64.32] ἐγένετο πτωχὸς ὁ πλούσιος, οὐκ ἀπολέσας τὸν πλοῦτον, ἀλλὰ κρύψας τὸν πλοῦτον·

[00478]    Γινώσκετε γὰρ, φησὶ, τὴν χάριν τοῦ Κυρίου, ὅτι δι' ἡμᾶς ἐπτώχευσε πλούσιος ὢν, ἵνα ἡμεῖς τῇ ἐκείνου πτωχείᾳ πλουτήσωμεν.

[00479]    Εἶδες πτωχείαν πλούτου μητέρα;

[00480]    εἶδες πενίαν περιουσίας ὑπόθεσιν;

[00481]    ὁ πλούσιος ἐγένετο πτωχὸς, ἵνα ἐγὼ ὁ πτωχὸς γενῶ πλούσιος.

[00482]    Ὡς ἰατρὸς περιεζώσατο λέντιον.

[00483]    Ποῦ κατέβη;

[00484]    Λέντιον περιεζώσατο·

[00485]    οὐκ ἤρκησεν αὐτῷ τῆς φύσεως ἡ περιβολὴ, ἀλλὰ καὶ σχῆμα δούλου ἀνέλαβεν, οὐ φύσιν δούλου μόνον.

[00486]    Ἦλθε τοίνυν, νοσοῦσαν ηὗρε τὴν φύσιν τὴν ἡμετέραν, ἐγένετο τοῦτο ὅπερ εἰμὶ ἐγὼ, ἁμαρτίας μέντοι χωρίς·

[00487]    ἦλθεν εἰς τὴν καλύβην εἰς ἣν κατεκείμην·

[00488]    εἶδε σκώληκας, εἶδε σηπεδόνας, εἶδε δυσωδίαν πολλὴν, τὸν νόμον οὐ βοηθοῦντα, τοὺς προφήτας κατηγοροῦντας, τὴν ἁμαρτίαν ἐπικειμένην, τὴν ἐπιθυμίαν τοῦ κάμνοντος ἄτακτον, οὐκ ἐγκρατεύεσθαι βουλόμενον, οὐδὲ ἀνεχόμενον τῶν ἰατρῶν.

[00489]    Οὐ φονεύσεις, οὗτος ἐφόνευσεν.

[00490]    Οὐ μοιχεύσεις.

[00491]    Ἕκαστος πρὸς τὴν γυναῖκα τοῦ πλησίον ἐχρεμέτιζεν·

[00492]    Οὐ κλέψεις.

[00493]    Ἀρὰ καὶ ψεῦδος καὶ μοιχεία καὶ κλοπὴ κέχυται ἐπὶ τῆς γῆς.

[00494]    Ἄλλα ἔλεγεν ὁ ἰατρὸς, καὶ ἄλλα ἐποίει ὁ νοσηρός.

[00495]    Τί γένηται;

[00496]    ὁ ἰατρὸς ἐπέταττεν, ὁ νοσηρὸς οὐχ ὑπήκουσε·

[00497]    τὸ νόσημα ηὐξάνετο, ὁ ἀνδραποδιστὴς διάβολος παρέμενε καθάπερ δοῦλος δραπέτης.

[00498]    Τί θέλεις;

[00499]    ψυχροποσίαν δίδωμι·

[00500]    τί θέλεις;

[00501]    κρέα δίδωμι, τὰ διαφθείροντά σου τὸν στόμαχον δίδωμι, τὰ ἐναντία τῷ ἰατρῷ.

[00502]    Ὁ ἰατρὸς ἐπέταττε, καὶ ἐξήρχετο·

[00503]    ὁ δραπέτης εἰσήρχετο κρύφα καὶ πάντα παρεῖχε.

[00504]    Πορνείαν θέλεις;

[00505]    ψεῦδος θέλεις;

[00506]    Ἐκεῖνος ἔλεγε·

[00507]    ταῦτα βούλομαι, οὐκ ἐκεῖνα ἃ λέγει ὁ ἰατρός·

[00508]    ταῦτα βούλομαι ἃ σὺ λέγεις.

[00509]    Τὰ σώματα ἄθλια ἀπώλλυτο.

[00510]    Θεὸς κατηγορεῖ, προφῆται κατηγοροῦσιν, ἐκεῖνος ὁ δήμιος παρέμενε, καὶ ἡ ἐπιθυμία τοῦ κάμνοντος πρὸς τὸν βλάπτοντα, οὐ πρὸς τὸν ὠφελοῦντα.

[00511]    Ἀπώλλυτο τὸ γένος, διέφθαρτο πάντα.

[00512]    Ἦλθεν ὁ ἰατρὸς ὁ εὔπορος ἐν ἀπόροις, ὁδὸν εὑρὼν ῥᾳδίαν καὶ εὔκολον καὶ σωτήριον.

[00513]    Ἐὰν εἴπω, φησὶ, Τὸ καὶ τὸ ποιήσατε, οὐ ποιοῦσι.

[00514]    Πῶς;

[00515]    τὰ τοῦ νόμου οὐκ ἐδέξαντο, καὶ τὰ τῆς χάριτος ἔχουσι δέξασθαι;

[00516]    τὰ κάτω οὐκ ἐδέξαντο καὶ τὰ ἄνω ἔχουσι δέξασθαι;

[00517]    Ἐὰν εἴπω νηστείαν, ἐὰν εἴπω σάκκου περιβολὴν, ἐὰν εἴπω ἀκτημοσύνην, ἐὰν εἴπω παρθενείαν, γάμον οὐκ οἴδασι σεμνὸν, καὶ περὶ παρθενείας ἔχω εἰπεῖν;

[00518]    τὰ ἀλλότρια ἁρπάζουσι, καὶ περὶ ἀκτημοσύνης αὐτοῖς ἔχω εἰπεῖν;

[00519]    πορνεύουσι, μοιχεύουσι, καὶ σάκκου περιβολὴν ἔχω εἰπεῖν;

[00520]    Τί οὖν;

[00521]    γίνομαι ἄνθρωπος τέως ἐν τῇ σαρκὶ τῇ ἐμῇ, καὶ τῷ ἀπεῤῥιμμένῳ διαλέγομαι·

[00522]    καταργῶ τὴν ἁμαρτίαν τέως, ἀπὸ τοῦ γένους δείκνυμι ὑγιαίνοντα ἄνθρωπον·

[00523]    δείκνυμι τὴν αὐτὴν φύσιν, καὶ οὐ τὸ αὐτὸ πτῶμα·

[00524]    δείκνυμι ἄνθρωπον ἁμαρτίαν οὐ ποιήσαντα, οὐδὲ δόλον ἐν τῷ στόματι αὐτοῦ, ἵνα καὶ οὗτοι θεαταὶ ὄντες ἔχωσιν ἐλπίδα σωτηρίας, καὶ οἱ ἐπιβουλεύοντες ἀποφύγωσι, καὶ ἴδωσιν ἄνθρωπον μὴ ἔχοντα ἁμαρτίαν.

[00525]    Αἰσχύνου, διάβολε.

[00526]    Τοῦτο σάρξ ἐστι, τοῦτο σῶμά ἐστιν, ὃ ἔχει ὁ ∆εσπότης μου.

[00527]    ∆ιὰ τοῦτο περιήρχετο ἀεὶ λέγων, εἰ Υἱὸς ᾖ τοῦ Θεοῦ οὗτος ὁ ἄνθρωπος, πῶς οὐχ ἁμαρτάνει;

[00528]    πάντες οἱ ἄλλοι ὑπὸ ἁμαρτίαν εἰσίν.

[00529]    Οὐ γάρ ἐστι φύσεως ἁμαρτία, ἀλλὰ προαιρέσεως.

[00530]    Ἰδοὺ δίδωμι ἄνθρωπον ὑγιαίνοντα, σκεῦος ἐκκεκαθαρμένον καὶ ἀκηλίδωτον.

[00531]    Καὶ στὰς ἐν μέσῳ δήμου ἔλεγε·

[00532]    Τίς ἐξ ὑμῶν ἐλέγχει με περὶ ἁμαρτίας;

[00533]    καὶ οὐδεὶς ηὗρεν εἰπεῖν τι.

[00534]    Τί οὖν νῦν;

[00535]    εἰσέρχεται πρὸς τοὺς νοσοῦντας τέως, λόγοις αὐτοὺς παρακαλῶν, ὥσπερ ἰατρὸς διὰ τῶν φαρμάκων·

[00536]    οὐδὲν ἔχεις πονηρὸν, ἐὰν σωφρονῇς·

[00537]    χαλεπὸν τὸ νόσημα, ἀλλὰ δύναται λυθῆναι.

[00538]    Παρακαλεῖ αὐτοὺς, ∆εῦτε πρός με πάντες οἱ κοπιῶντες καὶ πεφορτισμένοι, κἀγὼ ἀναπαύσω ὑμᾶς·

[00539]    πεφορτισμένοι ἦσαν οἱ νοσηροί·

[00540]    φορτία γάρ ἐστι νόσος, ἀταξία, πορνεία κλοπὴ, ψεῦδος, ψευδομαρτυρία·

[00541]    οὐ γὰρ οὕτω φορτίον βαρὺ, ὡς συνειδὸς πονηρόν.

[00542]    Ἀλλ' ἐπειδὴ ὁ νοσῶν φοβεῖται τὸν ἰατρὸν, μάλιστα ὅταν χαλεπὸν ᾖ τὸ νόσημα, μή που σιδήριον ὀξύνῃ, μή που πῦρ καίῃ, καὶ πολλοὶ τῶν νοσούντων εἵλαντο ἐναποθανεῖν τοῖς νοσήμασιν, ἢ ὑπομεῖναι τὴν ὀδύνην τὴν ἀπὸ τῆς ἰατρείας.

[00543]    καὶ καρπώσασθαι τὴν ὑγείαν τὴν ἀπὸ τῆς ὀδύνης, ἵνα μηδεὶς φοβηθῇ τοῦτο ὅτι·

[00544]    οὗτος ἦλθε, φησίν·

[00545]    Ἀπαιτεῖ ἡμᾶς εὐθύνας τῶν ἁμαρτημάτων·

[00546]    ἀπαιτεῖ ἡμᾶς τῶν πλημμελημάτων·

[00547]    κολάσαι ἡμᾶς ἔχει, καὶ τότε ἡμᾶς διορθοῦται·

[00548]    ἵνα μηδεὶς τοῦτο ἐννοήσας φύγῃ·

[00549]    ∆εῦτε, φησὶ, πρός με.

[00550]    Οὐκ ἦλθον ἵνα κρίνω τὸν κόσμον ^[64.33] ἀλλ' ἵνα σώσω τὸν κόσμον.

[00551]    Οὐδὲν βαρύ·

[00552]    οὐκ ἔχω σιδήριον, οὐκ ἔχω πῦρ καῖον, οὐ καίω, οὐ τέμνω·

[00553]    ἀνώδυνος ἡ ἰατρεία, χωρὶς πόνου ἡ θεραπεία.

[00554]    Εἰ οὐ πιστεύετε, βλέπετε τὴν πόρνην, βλέπετε τὸν λῃστὴν, βλέπετε τοὺς Μάγους, τὸν τελώνην, τὴν Χαναναίαν·

[00555]    ὑπόδειγμα ὑμῖν ἔδωκα ἐκ προοιμίων·

[00556]    μὴ ἔκαυσα;

[00557]    μὴ ἔτεμον;

[00558]    οὐκ ἐδάκρυσε μόνον ἡ πόρνη, καὶ παρθένων ἐγένετο σεμνοτέρα;

[00559]    οὐ προσεκύνησαν οἱ Μάγοι, καὶ εὐαγγελισταὶ ἐγένοντο;

[00560]    οὐκ ἦλθεν ἡ Χαναναία, καὶ τὴν ἰατρείαν ἔλαβε τοῦ θυγατρίου;

[00561]    Οὐκ ἦλθον, ἵνα κρίνω τὸν κόσμον, ἀλλ' ἵνα σώσω.

[00562]    ∆εῦτε πάντες οἱ κοπιῶντες καὶ πεφορτισμένοι.

[00563]    Ταῦτα λέγω τὰ ῥήματα·

[00564]    ∆εσπότης εἰμὶ, οὐ χρείαν ἔχω, οὐκ εἰμὶ δοῦλος ὑποκείμενος νόμῳ·

[00565]    κατηγορεῖ σου ὁ νόμος, ἀλλὰ λύω τὴν κατηγορίαν·

[00566]    αὐτὸν τὸν κατήγορον παύω.

[00567]    Πῶς;

[00568]    Ἔπαυσε γὰρ αὐτὸν ἡ χάρις·

[00569]    κατηγοροῦσιν οἱ προφῆται, ἀλλὰ μείζονα δίδωμι τὴν ἐλευθερίαν.

[00570]    Ἐλθὼν τοίνυν καὶ εὑρὼν τὴν φύσιν κακῶς ἔχουσαν, καὶ τοὺς μὲν ἐν πορνείᾳ, τοὺς δὲ ἐν μοιχείᾳ, κνίσσαν καὶ καπνὸν τὸν ἀέρα μολύνοντα, τὰ ἄλλα πάντα, τί ποιεῖ;

[00571]    Ὁρῶν πυρέττον τὸ γένος τὸ ἡμέτερον, λούει·

[00572]    πρῶτον λέγει, Λοῦσαι, καὶ ἀπαλλάσσου τοῦ νοσήματος·

[00573]    λούει λουτρῷ παλιγγενεσίας καὶ ἀλείφει·

[00574]    καὶ τῷ χρίσματι τοῦ μύρου ἀλείφω σε, καὶ λούω καὶ μεταβάλλω σε.

[00575]    Καὶ τοσαύτη ἡ ἰσχὺς τοῦ λουτροῦ;

[00576]    Τοσαύτη.

[00577]    Κατάβηθι κάτω.

[00578]    Καταβαίνει κάτω, καὶ οὐ μένει ὁ παλαιὸς ἄνθρωπος.

[00579]    Μὴ σιδήρου χρεία;

[00580]    μὴ τομῆς καὶ ὀδύνης;

[00581]    ἐν ἡδονῇ ἡ ὠφέλεια·

[00582]    μὴ ἐπίπονος ἡ ἰατρεία;

[00583]    Καὶ τί ποιήσομεν ἵνα σωθῶμεν;

[00584]    μυρία εἰργασάμεθα κακὰ, πονηρὸν ἔχομεν συνειδὸς, ἀπωλόμεθα.

[00585]    Λέγει βαπτίζεσθαι καὶ σώζεσθαι·

[00586]    καὶ γὰρ λαβὼν χρίει, λούει, εἶτα τρέφει στερεὰν τροφήν.

[00587]    Ἐπειδὴ γὰρ ἀθῶος ὁ νοσηρὸς ἐγένετο, τρέφει αὐτὸν καὶ τρέφει τὸ σῶμα τὸ ἑαυτοῦ, καὶ ποτίζει τὸ αἷμα τὸ ἑαυτοῦ·

[00588]    Ἐμοῦ, φησὶ, τοῦ ἀναμαρτήτου.

[00589]    Ἐπειδὴ γὰρ ἐγένου σὺ ἀναμάρτητος ἀπὸ τοῦ λουτροῦ, λαβὼν σῶμα τοιοῦτον, χρίει, λούει, τρέφει.

[00590]    Τοῦτό ἐστι καινὴ κτίσις.

[00591]    Ὅταν εἰσέλθῃ πόρνος, καὶ γίνεται δίκαιος, οὐκ ἔστι καινὴ κτίσις;

[00592]    ὅταν εἰσέλθῃ ἅρπαξ, καὶ ἀπαλλαγῇ τῶν ἁμαρτημάτων, οὐκ ἔστι καινὴ κτίσις;

[00593]    Εἶδες ἐν τῇ χάριτι τὴν κτί ^[64.34] σιν;

[00594]    βλέπε καὶ ἐν τῇ πολιτείᾳ τὴν κτίσιν.

[00595]    Πόσαι πόρναι κατέλειπον τὰ θέατρα, ἀφῆκαν σηρικὰ ἱμάτια, κατεπάσσαντο σποδὸν, περιεβάλλοντο σάκκους, καὶ νῦν πολιτεύονται ἐν Χριστῷ;

[00596]    οὐκ ἔστι καινὴ κτίσις;

[00597]    Ὅταν οὖν ἴδῃς τὴν πόρνην μηκέτι πόρνην, ἀλλὰ παρθένου σεμνοτέραν, εἰπέ·

[00598]    Ἐκτίσθη αὐτῆς ἡ γνώμη, μετεβλήθη αὐτῆς ἡ καρδία, μετέστη ἡ διάνοια ἀπὸ τοῦ τρόπου·

[00599]    οὐκ ἔτι αὐτὴ εἰς τὸ θέατρον, οὐκέτι ἄλλους βροχίζει, ἀλλὰ καὶ αὐτὴ σώζεται·

[00600]    οὐκέτι ἄλλοις γίνεται σκάνδαλος, ἀλλὰ σωτηρία·

[00601]    βλέπουσι γὰρ οἱ πόρνοι, καὶ σώφρονες γίνονται.

[00602]    Ὁρᾶς καινὴν τὴν κτίσιν;

[00603]    Ὅταν ἴδῃς τὸν ἅρπαγα, τὸν Ἕλληνα, τὸν βωμοὺς λείχοντα, τὸν μαινόμενον κατὰ Χριστιανῶν, μυρίους ἀποδύοντα ὀρφανοὺς, μυρίας γυμνοῦντα χήρας, Χριστιανὸν γενόμενον, καὶ τὰ ἑαυτοῦ διδόντα πένησι, καὶ εἰς παννυχίδας παραγινόμενον, εἰπὲ, Ἐκτίσθη ὁ αὐτός·

[00604]    ὥστε, Εἴ τις ἐν Χριστῷ, καινὴ κτίσις.

[00605]    Ὅρα πανταχοῦ τῆς οἰκουμένης καινὴν τὴν κτίσιν.

[00606]    Ὅταν ἴδῃς μοναχοὺς ὄρη κατειληφότας, ἐσταυρωμένους, τὰς ἀνάγκας τῆς φύσεως καταπατοῦντας, ἀγγέλους μιμουμένους τῇ ἀπαθείᾳ·

[00607]    ὥστε, Εἴ τις ἐν Χριστῷ, καινὴ κτίσις.

[00608]    Ἄπελθε εἰς Περσίδα, εἰ μὴ καὶ τῷ σώματι, ἀλλὰ τῷ νοΐ·

[00609]    μητέρας ἐγάμουν, νῦν δὲ παρθενίαν ἀσκοῦσιν.

[00610]    Ὥστε, Εἴ τις ἐν Χριστῷ, καινὴ κτίσις.

[00611]    Μέχρι βασιλέων βλέπε τὴν κτίσιν τῶν τὰ διαδήματα ἐχόντων.

[00612]    Πρὸ τούτου βασιλεῖς πάντα ἔπλησαν ἀσεβείας, νῦν δὲ βασιλεῖς εἰς ἐκκλησίαν ἀπαντῶσι·

[00613]    καίτοι πᾶσι φοβεροὶ οἱ βασιλεῖς·

[00614]    νῦν δὲ ἡ Ἐκκλησία αὐτοῖς φοβερά.

[00615]    Τίς τολμᾷ εἰπεῖν βασιλεῖ, Θές σου τὸ διάδημα;

[00616]    ἡ δὲ Ἐκκλησία αὐτῷ λέγει, καὶ ὑπακούει, καὶ ἔρχεται γυμνῇ τῇ κεφαλῇ οὐδενὸς λέγοντος, ἀλλὰ τοῦ λογισμοῦ παραινοῦντος·

[00617]    γυμνῇ τῇ κεφαλῇ καὶ ἀκαλλωπίστῳ·

[00618]    ῥίπτει διάδημα, καὶ λαμβάνει σταυρόν.

[00619]    Εἰσέρχεται εἰς τὴν τράπεζαν ὁ πτωχὸς καὶ ὁ βασιλεὺς ὁμοίως·

[00620]    οὐκ ἄλλως ὁ πτωχὸς, καὶ ἄλλως ὁ βασιλεύς·

[00621]    οὐδὲ λέγει ὁ βασιλεὺς, Ἐμοὶ πλέον δὸς, καὶ τῷ πτωχῷ ἔλαττον, ἀλλὰ τὴν αὐτὴν ταπεινοφροσύνην, τὴν αὐτὴν εὐλάβειαν ἔχων, ὡς ὁ πτωχὸς καὶ ἐγώ·

[00622]    ὥστε, Εἴ τις ἐν Χριστῷ, καινὴ κτίσις.

[00623]    Ὑπὲρ δὲ τούτων ἁπάντων εὐχαριστήσωμεν τῷ Θεῷ, ὅτι αὐτῷ ἡ δόξα εἰς τοὺς αἰῶνας.

[00624]    Ἀμήν.

© 2006 Cooperatorum Veritatis Societas quoad hanc editionem iura omnia asservantur.
0345-0407 - Iohannes Chrysostomus - In illud Si qua in Christo nova creatura
Litterarum Omnium Conspectus: 147 Litterae, quae repetitae sunt in 28,113 occasionibus